فرانسا فرضات على اللي يدخل لاراضيها تيست بي سي ار ولكن كيفاش غادية تحارب تزويرو

افادت سفارة فرانسا بالرباط باللي انطلاقا من لاربعا الجاية اللي بغى يدخل لاراضيها من المغرب خاصو ضروري تيست "بي سي ار" مدتو 72 ساعة.
هاد القرار جا من باريس ولكن اكيد عندو علاقة بالارتفاع المخيف لعدد الاصابات بالمغرب فليام الاخيرة. كنديرو 21 الف تيست فالنهار وكتخرج لينا 5600 حالة. تصورو كون كنا كنديرو مائة الف شحال غاديين نوصلو.
الدول الغربية هاد الشي كيكون عندهم مراقب. ثم فرانسا براسها راها غارقة. كدير بزافت التيست وعندها ارقام كتفوت بعض المرات 50 الف حالة فالنهار. اييه هما عدد سكانهم شي 67 مليون نسمة ولكن راه رقم كبير
دابا فرانسا عندها تحدي اخر. شحال من واحد يقدر يزور التيست او ياخد شهادة باللي ما فيهش بلا ما يدير التيست. كيفاش غادية تحارب هاد التزوير واش غادية تتفاهم مع مختبرات معينة تيق فيهم؟ دابا نشوفو
هاد الشي ديال التيست المغرب فرضو هادي مدة ودابا دول اوربية غادية حتى هي تفرضو على اللي جاي من المغرب. لحد الان دابا كاينة غير فرانسا. اسبانيا مازال ما فرضاتوش