زعيم الحزب الشعبي كاسادو لاخنوش ونزار: باش نوصل لمانكوا اول زيارة نديرها للمغرب وغاديين نسولو الحكومة على قضية غالي ولشكر: موقف واضح من سانشيز بوحدو يجنبنا ازمة شاملة

قال بيان للحزب الشعبي الاسباني ان اللقاء عبر الڤيزيو كونفيرونس للي جمع زعيمهم بابلو كاسادو مع كل من عزيز اخنوش رئيس التجمع الوطني للاحرار ووزير الفلاحة والصيد البحري ونزار بركة الامين العام لحزب الاستقلال البارح الثلاث 11 ماي 2021 جا بطلبهم هما.
لقاء جا على خلفية دخول زعيم البوليساريو ابراهيم غالي بجواز ديبلوماسي جزائري وهوية مزورة ومخبي لصبيطار لوگرونيو ف18 ابريل للي فات. دخول كان سبب ازمة مغربية اسبانية.
بيان الحزب للي نشراتو الصحافة الاسبانية كشف ان كاسادو خبر المسؤولين الحزبيين لمغاربة باللي ايلى وصل للحكومة فالانتخابات الجاية٬ غادي يدير اول زيارة للمغرب. غادي يرجع التقليد اللي كانو كيديروه رؤساء الحكومة فاسبانيا باستثناء الحالي بيدرو سانشيز.
كاسادو قال باللي كيتجنب يهدر على امور كتهم العلاقات الخارجية لبلادو خارج اسبانيا٬ غير انه اوضح حزبه قدم 5 اسئلة للحكومة على قضية دخول غالي.
وفي علاقة بالموضوع٬ قال ادريس لشكر الكاتب الاول للاتحاد الاشتراكي فحوار مع "اب بي سي" الاسبانية اننا نعيش اعمق ازمة بين مدريد والرباط. لشكر استغرب من "الاسباب الانسانية" اللي بررات بيها الحكومة الاسبانية استقبال غالي٬ وقال "كان عليها تتهم باللاجئين فتندوف".
وشدد ان الشعب المغربي شعر بالخيانة من جاره الاسباني بسبب هاد التصرف واكد ان فقط "موقف واضح" من الحكومة الاسبانية قادر على تجنب "ازمة شاملة بين الدولتين الجارتين"