واش فوز اليمين المتطرف فسبتة تهديد للمغرب ولا تهديد لاسبانيا

البارح سانتياگو ابسكال زعيم حزب “بوكس” اليمين المتطرف الاسباني كان فرحان وهو كيعاود اسماء المدن اللي ربح فيهم 52 مقعد فمجلس النواب الجديد. مدينة سبتة كانت من بين هاد المدن. هاد المدينة المستعمرة من قبل اسبانيا حصل فيها الحزب اليميني المتطرف على اعلى الاصوات. فالتقسيم الانتخابي فاسبانيا كيعطي لهاد المدينة مقعد فمجلس النواب. المقعد ربحاتو تيريزا لوبيس.
الفوز فسبتة عندو معاني كثيرة عند هاد الحزب. لمدينة كانت فرصة باش يجبد فيها المواضيع المحببة عند اليمين المتطرف: الهجرة. طبعا المواضيع الاخرى بحال النمو الديموغرافي والاسرة .. حتى هي تحبدات.
هاد الحزب كان اعلن فقضية الهجرة انو كيقتارح بناء سور باش يوقف توقف المهاجرين. نقطة اخرى كان علن عليها من هاد المدينة وهو الحديث عن النمو الديموغرافي فالمدينة. قال باللي الصبليون مهددين حقاش لمغاربة كيولدو بزاف.
ربح الانتخابات فهاد المدينة حقاش وظف هاد الخوف فحملتو. قال للسكان الصبليون باللي مهددين من المغاربة. باللي النمو الديموغرافي فهاد المدينة فصالح المغاربة ماشي الصبليون. بغى يدير سياسة تشجع باش يولدو الصبليون. طبعا هاد الخوف باش كيعيش التطرف فكاع اوربا
لكن اش نا هو الجانب السلبي فهاد الفوز للمغرب؟ يوصل عندك اليمين المتطرف لمدينة مستعمرة وحداك فحد ذاتو خطر. ايلى طبقو بعض ما جا فبرنامجهم الانتخابي غاديين يضيقو بزاف على لمغاربة. الحكومة ما غادينش يدخلو ليها ولكن ولاو ممثلي المدينة فمجلس النواب. صوتهم فمدريد. غاديين يشعلو لمدينة بشعارات عنصرية.
اما الجانب الايجابي فهو ان وصول التطرف لمدينة بحال سبتة مؤشر على ازمة كبيرة. المغرب خنقهم اقتصاديا باش غلق المعابر. اثر هاد الشي اقتصاديا وعانات الساكنة وما لقات جواب غير عند اليمين المتطرف.
المغرب دابا بحال شي حد مخلي هاد الفاكهة ماشي غير طيب بل تخماج. باغي الوضعية تزداد تقواد عليها. ديك الساعة المغرب يولي حل لمشاكلهم. هاد الشي يقدر ياخد وقت طويل.