مشاو يعومو وخا الحجر الصحي. جوج رجال هربو عريانين فاش هجم عليهم حيوان و تلفو وسط الغابة.. والبوليس ضربوهم بخطية – فيديو

جوج رجال (واحد عندو 30 عام و لاخور 49) في استراليا خرقو إجراءات الحجر الصحي، اللي تفرض هاد ليامات ف بعض البلايص بعد الإنتشار الكبير السلالة الجديدة ديال كورونا تماك، وخرجو يتبرونزاو ف البحر، جنوب سيدني، لكن زهرهم العوج خرجات ليهم كابرا (Capra)، وهو نوع ديال الماعز الخلوي، من الغابة القريبة وملي شافوها تخلعو وهربو وسط الشجر.
الرجال كانو زبطين وغاديين هربانين وسط ديك الغابة من بعد شويا غادي يعيقو أنهم توضرو و تلفو الطريق، و فاش تزيرو عيطو على البوليس باش يعتقوهم. و كانت شاركات طيارات في عملية البحث عليهم.
بعدما عتقوهم البوليس ضربوهم بخطية كبيرة بسباب خرقهم لإجراءات الحجر الصحي.
يذكر أن السلطات في استراليا، وفي سيدني تحديدا، فارضة الحجر الصحي وكلشي يبقا في دارو، و ممنوع الخروج من حدود سيدني.