جا الوقت باش يترفع الحجر الصحي على مدن ما تسجلات فيها حتى حالة د"كورونا فيروس". علاش ما تكونش هاد البلايص تجارب لمغرب ما بعد الحجر ونكافئو المدن اللي دارت مجهود ويخليو السكان يعيشو حياتهم. علاش بحال لعيون والشاون وبنسليمان يبقاو محبوسين

كلشي المؤشرات على الحالة الوبائية فالمغرب ايجابية. البارح الاثنين 4 ماي 2020 قدم محمد اليوبي مدير مديرية علم الأوبئة ومكافحة الأمراض بوزارة الصحة حالة وبائية متحكم فيها. فيروس غادي ويتراجع. 6 جهات ما تسجل فيها حتى حالة. والو: جهات الجنوب الثلاث: كلميم واد نون والعيون الساقية الحمرا والداخلة واد الذهب بالاضافة الى الجهة الشرقية وجهة سوس ماسة وجهة تافيلالت درعة. نقطة ايجابية اخرى وهي ان اللي تشافاو غير البارح وصلو ل215 حالة. وصلنا دابا من نهار بدا الفيروس حتى اليوم ل1653 حالة من اصل 5053 حالة فيها هاد الفيروس. رقم مزيان وغادي ويطلع. نسبة التعافي فحدود 7.23 بالمائة فالمقابل نسبة القتل ديال هاد الجايحة غادية وتنزل. دابا فحدود 3.5 بالمائة.
نقطة اخرى ايجابية كان كشف عليها خالد ايت الطالب وزير الصحة قبل ايام وهي ان مؤشر انتقال العدوى فحدود 1.7 بالمائة وقال باللي المغرب يرفع حالة الطوارئ الصحية باش نزلو على 1.
هاد النسبة راه فكاع بلايص المغرب هو معدل وطني. كاينين جهات فيها النسبة قل من واحد. لهاد السبب كيبان منطقي نبداو عملية رفع تدريجي لحالة الطوارئ الصحية.
علاش مازال هاد التزيار مستمر فمدن ما تسجلات فيها حتى حالة كوروما فيروس من نهار بدات هاد الجايحة. شفشاون ولا لعيون ولا بوعرفة ولا ايموزار ولا اوسرد ولا السمارة ولا سيدي ايفني او بنسليمان او سيدي بنور او اصيلة او شي مدن عرفات حالات قلال وولات خالية من الفيروس بحال فكيك ووزان.
الدولة اللي مركزية وكلشي كيجي من الرباط ممكن تاخد مدن بحال هادي تكون مدن وتكون تجارب على الطريقة اللي ممكن تتبعها الدولة فمغرب ما بعد الحجر الصحي. منها نستافذو من الاخطاء اللي ممكن تكون ونصححوها. هاد المدن تبقى مراقبة ما يخليو حد يدخل فيها ويرجعو ليها الحياة الاقتصادية والاجتماعية والثقافية. خاصنا نبداو.
كل دولة دارت اجراءات لرفع حالة الطوارئ للعودة للحياة العادية. كل دولة كان عندها اجراءاتها الخاصة. حنا خاصنا بنفس الطريقة اللي واجهنا بيها الجايحة تكون طريقة مغربية باش نرجعو الحياة.
لا يعقل يتشدو ناس فهاد المدن بتهمة خرق الحجر وهما اكثر من شهر ما فيهم حتى حالة. اللي ممكن يكون هو اجبارية وضع الكمامة.
راه كلشي عيى. هادي فرصة يرتاح كلشي. مواطنين وسلطات عمومية وصحية.. كلشي يتنفس. خاصنا نبداو اليوم قبل غدا فهاد الاجراءات. خليو الناس يخرجو يتمشاو يتحركو. طبعا بالتدريج وغير فالمدن المجتهدة اللي بقات خالية من الفيروس.
قتصاديا ما قاردينش نستمرو فهاد الحالة اكثر. اجتماعيا كذلك. خاص الامل للمغاربة. الامل ممكن يكون فهاد المدن اللي تكون تجارب لمغرب بعد هاد الجايحة. طبعا غاديين نبقاو متعايشين معاها طالما مازال ما كاين حتى تلقيح يقضي عليها.