بيان "البيجيدي" ضد أحجيرة نوض الصداع فجماعة وجدة..وأفتاتي ل"كود": ماعندي بيه تاشي علاقة

ناض صداع من جديد ف وسط فريق حزب "المصباح" فالجماعة د وجدة، حيت كلشي ولا كيسول شكون اللي كان مورا البيان اللي وصف فيه حصيلة الجماعة ب"الهزيلة"، خاصة وأنه مخضعش للمسطرة اللي كيخدم بيها "البيجيدي" فإصدار البيانات.
مصادر من داخل حزب رئيس الحكومة، قال ل "كود"، أن البيان مصادقش عليه الفريق حيت أصلا كيعيش انقسام كبير، فحين كان من المفروض تصادق عليه الكتابة الجهوية، قبل متصادق عليه الأمانة العامة وهاد الشي مدارش أصلا، وهو اللي كيبين أن أفتاتي هو اللي كان من موراه.
وأضافت، أن السرعة اللي خرج بيها البيان كتبين بللي أفتاتي اللي باغي إترشح فالانتخابات البرلمانية فوجدة، معجباتوش الطريقة باش أهضر، عمر أحجيرة، فاللقاء نتاع نزار بركة فوجدة على الحكومة، بعدما قال أن المغاربة كيتمناو تمشي حكومة العثماني حيت مدارت ليهم والو، وهاد الشي اللي خلاه إدافع على الحكومة ويرد الصرف لعمر أحجيرة.
عبد العزيز أفتاتي عضو الأمانة ل"البيجيدي"، نفى فالتصريح نتاعو ل "كود"، أنه تكون عندو علاقة بالبيان، حيت قال أنه ماشي عضو فالمجلس ومعارفش حتى المضمون نتاعو، فحين أكد بللي غادي أترشح فالانتخابات البرلمانية ف وجدة، وغادي ينزل للتيران ويدير الحملة مع الحزب نتاعو من وجدة حتى ل لكويرة.
ومن جهتو قال محمد شقيربان عضو فريق "البيجيدي" فجماعة وجدة فالتصريح نتاعو ل "كود"، أن البيان تم التداول فيه داخل الفريق وأن الكتابة الإقليمية أقرت على صوابه وما يحتويه ، وأن أي شخص لم يجدد عضويته بالحزب يعتبر دخيل على النقاش، في إشارة للكتابة الإقليمية لقديما اللي جرات العثماني الأمين العام ل"لمصباح" للمحاكم، بعدما حل ليهم الكتابة الإقليمية مباشرة بعد التحالف اللي نسجوه مع الفريق نتاع "البام" فجماعة وجدة.