"البيجيدي" باغي ارشح أفتاتي للبرلمان فوجدة بعدما ترون ليهم الحزب

بعدما أصبح حزب "المصباح" فمدينة وجدة كيعيش مجموعة نتاع المشاكل، فكر فتخريجة جديدة باش احافظ على ماء الوجه نتاعو، واختار عبد العزيز أفتاتي عضو الامانة للحزب باش اترشح في الانتخابات البرلمانية، حيتاش هو كيفهم فالشعبوية وقادر باش امارس خطاب "المظلومية" باش اغطي على فشل الحزب في تدبير الشأن العام.
هاد الخطة اللي اعتمدتها الامانة العامة ل"البجيدي"، كاتجي اف واحد لوقيتا محرجة، حيت سبق ليها وحلات هياكل الحزب وجرات على جميع الاعضاء باستثناء عدد قليل من المحسوبين على "تيار أفتاتي"، وذلك بسباب تحالفهم مع حزب الاصالة والمعاصرة بالجماعة نتاع وجدة.
الناس اللي مهتمين بالسياسة قالو ل"كود" أنهم كيشوفو بللي أفتاتي غادي تصعاب عليه الانتخابات اف وجدة، حيت المطرودين عندهم امتداد كبير داخل تنظيمات الحزب، بما فيها حركة التوحيد والإصلاح الذراع الدعوي للحزب.
مصادر مطلعة قالت في تصريحها ل"كود"، ان الكتابة الجهوية للحزب ولات خدامة بالسكات وكتحاول تغطي جميع الجماعات الترابية اللي تابعة ال عمالة وجدة انجاد باش تخلي أفتاتي يتمكن من الحصول على مقعد برلماني، حيث ولا صعيب عليها اتجيب زوج مقاعد خاصة مع اعتماد القاسم الانتخابي.
نفس المصادر، كشفات ل"كود" بللي حزب العدالة والتنمية كيتوقع أنه غادي يحصل في الاستحقاقات التشريعية المقبلة على مقعد واحد، في حين كيتوقع أنه غادي يحصل كل من حزب الأصالة والمعاصرة، الاستقلال، والاتحاد الاشتراكي للقوات الشعبية على مقعد واحد، عكس حزب التجمع الوطني للأحرار في الانتخابات اللي مضرباش ليه لحساب.