وحتى المطارات كولها تسيبات. لا كمايم لا تباعد =فيديو

خرجات هادي يومين وزارة الصحة دورية كتهدر على ضرورة رفع درجة اليقظة فمواجهة المتحور "ديلطا" ديال هاد الويل دكورونا. بدات الحالات كترتافع. وزارة الداخلية حتى هي طلبات من السلطات تزير. لكن ما يمكنش نقولو التزيار وبلايص بحال المطارات مكفسينها.
هادوك اللي راجعين للمغرب شي بعد عام او عامين وشي بعد مدة تقدر تكون اطول٬ كلهم جاو من بلايص اللي ممنوع فيها شي حد يدور بلا كمايم. هادو غير كيوصلو للبلاد كيبداو السيبة.
الفيديو اللي تنشرو "كود" من مطار محمد الخامس البارح بعد وصول طيارة من دبي. هادي راها فاللائحة "بي" وخاص تعامل خاص معاها. فالفيديو الناس مجمعين. يعني هاداك التباعد ما كاينش زيد عليه ما كاينش لكمايم عند كثير.
هاد المتحور "دلطا" اللي جا من الهند سريع الانتقال وهاد الشي كيفسر علاش رتافعات الحالات عندنا فالمغرب. البارح وصلنا ل951 حالة ف24 ساعة فيهم 34 حالة مشات للانعاش ومحتاجة للعناية المركزة.
هاد الرقم هو اللي مهم بزاف. حقاش دابا كاين عندنا يالله 9 حالات تحت التنفس الاصطناعي الاختراقي و141 تحت التنفس الاصطناعي غير الاختراقي. ورقم اخر مرتابط بهاد الشي هو نسبة ملء اسرة الانعاش ديال كوفيد. حنا فالمغرب وصلنا ل7.7 بالمائة.
لكن اللي شفنا البارح فالمطار خطير. خاص تطبيق القانون وصافي.
https://www.facebook.com/watch/?v=394643195310179&extid=NS-UNK-UNK-UNK-IOS_GK0T-GK1C