اش هاد الفضيحة هاد اللي كيكول لفتيت صاحبو. دابا والي الجهة الشرقية كيدير حملة مع افشل رئيس جهة البامي بعيوي- تصاور

دابا وزارة الداخلية مانعة العمال او الولاة يبانو مع مرشحين للانتخابات اللي باقية ليها شهر وشي ايامات ولكن رئيس الجهة الشرقية عبد النبي بعيوي كيمثل استثناء فهاد لبلاد. هاد البامي اللي كان غابر فهاد المدة كلها اللي كان فيها رئيس خرج فالايام الاخيرة وعاطيها لحملة انتخابية سابقة لاونها. كيتلاقى مع الناس وكيعتارف انو كيخرق القانون وكتسمعو السلطات وكتساعدو كاع
نهار الاحد اللي فات دخل فمرحلة جديدة فحملتو الانتخابية بدعم من والي الجهة الشرقية معاد الجامعي. هو براسو قالها. نشر تصاورو مع شركة اسمها ديلفي وقال باللي باغية دير وحدة صناعية وغادية توفر 3500 منصب شغل.
حملة انتخابية كيوظف فيها الداخلية والصناعة والتجارة. يعني الدولة كلها مع السي بعيوي اللي كيقول فمجالسو باللي وزير الداخلية صاحبو.
بعيوي كتب فصحفتو "رئيس مجلس جهة الشرق يتباحث مع شركة "ديلفي" إحداث وحدة صناعية لتوفير 3500منصب شغل" وبدا هاد الشي بهاد الجملة اللي كتلخص كلشي "تباحث السيد عبد النبي بعوي رئيس مجلس جهة الشرق، إلى جانب السيد معاذ الجامعي والي جهة الشرق عامل عمالة وجدة أنكاد، مع ممثلي شركة "ديلفي"، لصناعة أسلاك السيارات "الكابلاج"، لوضع آخر الترتيبات المتعلقة بتشييد وحدة صناعية بالقطب الصناعي "تكنوبول" بوجدة، تروم توفير حوالي 3500 منصب شغل، وتساهم في امتصاص شبح البطالة بالجهة".
واكد باللي اللقاء كان فمقر الجهة. يعني دار كلشي باش يعطي الانطباع انو مول المشروع وباللي الجهة معاه. والي الجهة خطئو ان هاد الاجتماع فهاد الوقت ماكانش يدار ولا دار ما يحضرش ليه رئيس الجهة. هادي حملة انتخابية كيفاش يدعم رئيس جهة هو عارف باللي ما دار حتى شي حاجة لهاد الجهة.
مول قضايا الفساد اللي تابعاه خدم معاك كلشي. فضيحة الداخلية فهاد الوقت. جاها الحنين للتراكتور. حنين 2016 وهادي يومين رئيس الحكومة الامين العام لحرب العدالة والتنمية بكل غباء موقع مع الامين العام للبام بيان كيهدرو فيه على تخليق الحياة السياسية وضمان انتخابات نزيهة.
البام او الوافد الجديد صاحب مسيرة ولد زروال كيهدر علي التخليق. هاد الشي اللي وقع فوجدة هو التخليق عندهم.