ها كيفاش كانت أجواء انتخابات الغرف فكازا.. العيالات كثر من الرجال والمكاتب منعو الصحافة بسباب كوفيد وها الأحزاب المكتسحة – فيديو

عموما، دازت الانتخابات ديال الغرف المهنية فكازا فظروف مزيانة، اليوم الجمعة، مكاتب التصويت كانت منظمة الشغل، وكانت كتدخل المواطنين بالواحد مور لاخر باش تمنع الازدحام والتجمعات فهذ الظرفية ديال فيروس كورونا المستجد.
والسلطات منعات دخول الصحافة لمكاتب التصويت فكازا عموما، باستثناء الإعلام الرسمي اللي قدرات كاميراتو تلتقط عملية التصويت بالديطاي، وهذشي عزاول مراقبين لتجنب الاكتظاظ ما امكن فظرفية كورونا.
https://fb.watch/7dhMmhutZF/
وعاينات "كود" مكتب التصويت فالثانوية التأهيلية ابن تومرت، بالقرب من شارع الحسن الأول فالسونتر فيل، التابع لدائرة سيدي بليوط، اللي كان عليها الإقبال فالصباح، لكن فالعشية مابقاوش يجيو بزاف ديال الناس.
وملحوظ أن العيالات محتكرين التصويت، بحيث كانت النسبة ديالهم كثر من الرجال، الشي اللي كيعني أن العيالات هوما اللي غيختارو رؤساء الغرف المهنية فهذ الدائرة.
وحسب ما عاينات "كود" فمكتب ابن تومرت، فنسبة مهمة من المصوتين ختارو المرشحين ديال حزبي الحمامة والبام، وخصوصا هذ الأخير.
ولميكرو "كود"، عبرو المواطنين، اللي نسبة كبيرة منهم من الحرفيين، على تطلعاتهم وارتساماتهم بعد التصويت، وتمناو الخير ووضعية المهنيين تتحسن والبلاد تزدهم ومايخيبوهومش اللي وضعو فبهم الثقة.
وهذ العام مشاركين فانتخابات الغرف المهنية 12 ألف و383 مرشح، منهم 2940 مرا فقط، كيتنافسو على 2230 مقعد فغرف التجارة والصناعة والخدمات، والصيد البحري، والفلاحة، والصناعة التقليدية.
وفتحات مكاتب التصويت من 8 ديال الصباح اليوم، وبقات مستمرة حتى ل7 ديال لعشية.