رسميا.. فولكسفاكَن انسحبات من الدزاير.. وها شنو غادي دير مع الكليان اللي مازال عندهم ضمان خدمة ما بعد البيع

مجموعة "فولكسفاكَن" الألمانية انسحبات رسميا من السوق الجزائرية، وأعلنات بشكل نهائي قطع أي علاقة بشركة "سوفاك" الجزائرية.
وقالت "الشروق" الجزائرية أن هذشي جا بعدما كانت مهدات المجموعة لهذه الخطوة من العام اللي فات، من خلال تعاملاتها معها بشكل مؤقتة، وشارت لأنه بهذ الانسحاب مابقاتش غتضمن خدمات الصيانة لما بعد البيع، لكن فلمقابل، غتشوف المجموعة وكيل بديل لضمان هذ الخدمات للزبائن والوكلاء اللي مازال كيستفدو من الضمان.
وهذ القرار كيهم الطوموبيلات اللي عندها الضمان لنهاية يناير 2021، وكيبلغ عددها 97390 طوموبيل، و54693 ضمن أجندة عام 2022.
من جهتها، ذكرات مجموعة "سوفاك الجزائر" SOVAC فبيان ليها، أن ورشاتها مابقاتش كتمثل الشركة المصنعة "فولكسفاكَن"، من بعدما فشلو المفاوضات بين الطرفين.
وحسب البيان، وصلات "سوفاك" مراسلة من العملاق الألماني، كتعلمها من خلالو بقرارها المتمثل فقطع كل علاقات تجارية كانت كتربطها مع شركتي "سوفاك" الجزائر و"سوفاك" للإنتاج.
وكان "فولكسفاكَن" قررات فسخ العقود اللي دارت مع السلطات الجزائرية، وهكذا ماغيمكنش للشرطة الجزائرية تحصل على إمدادات من الشركة، واخا كان المصنع الألماني هو المورد الرسمي لطوموبيلات وسطافيطات البوليس فالبلاد.