سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
كيفاش المتطرف الكتاني لي كان محكوم عليه بعشرين عام مورا أحداث سطاش ماي الارهابية! خرج عاوتاني باش ينشر افكارو المتطرفة و تجرأ يقول على اللقاح أنه "خطير" ! واش نتا آ الكتاني جينيتيسيان ؟ ميكروبيولوجيست ؟! عندك شي لابوراطوار فالڤيلا ديالك ؟
لحد الآن التلقيح اختياري فالمغرب و فحال بزاف ديال الدول عبر العالم فأوروبا و آسيا جواز التلقيح ضروري لولوج بعض المرافق العمومية و هادا اجراء من بين بزاف ديال الاجراءات لي الهدف ديالها حماية عباد الله من الوباء ! طبعا هاد الاجراء نقدرو نتافقو معاه او نختالفو معاه كيما واقع فالعالم كامل ! و من حق أي واحد يعبر على الرأي ديالو ! ولكن لي خطير هوا بنادم يبدا يهضر و جيب يا فم و گول باش ينشر افكار مغلوطة ! شكون قال للكتاني المتطرف بلي اللقاح خطير باش ينوض يكتبها فالفايسبوك بلا حشمة بلا حيا ؟ عندو شي دراسات ؟ دار شي ابحاث فداك اللابوراطوار لي فالڤيلا ديالو ؟ قاري الكتاني اصلا شي علم كايمكنو يقولينا واش اللقاح خطير و لا لا ؟ جينيتيسيان ؟ ميكروبيولوجيست ؟ اختصاصي فالجهاز المناعاتي ؟ آش دخل حمارتو للفروسية اصلا ؟ هاد التطاول على العلم لي كايمارسوه بعض المتطرفين لي دماغهم عامر بنظرية المؤامرة راه غير معقول ! مي نعيمة تشدات حيت شككات فكورونا فالوقت لي الدولة كانت دايرة مجهود كبير باش تقنع الناس انهم يحميو راسهم باتباع اجراءات السلامة ! و الكتاني حر طليق كاينشر لينا الافكار المسمومة ديالو ضد اليهود و ضد المرأة و ضد المفكرين و المثقفين بكل أريحية و دابا ضد اللقاح واخا هوا بينو و بين العلم و الميكروبيولوجيا و الايمينولوجيا مابين السما و الارض فالوقت لي الدولة كادير مجهود باش تقنع الناس باللقاح !
