شوفو كيفاش الريسوني ديال علماء المسلمين فضل دولارات قطر على ارضو. فزمن "الحرب الباردة" دار فتوى ضد المغرب وغيرها بعد زيارة وزير الدفاع الاسرائيلي وقايد هجمة حقيرة منحطة على بلادو

المتطرف اللي كيخدم مصالح قطر وحكام قطر احمد الريسوني اختار يهاجم بلادو. سكت على تهديدات الجزائر بضرب المغرب. ضرب الطم فكاع المراحل اللي المغرب كان مهدد. غير باش جا وزير الدفاع الاسرائيلي بيني غانتس للرباط وهو يخرج يهاجم بوضاعة بلادو.
هو اللي كيرأس ديك الجمعية المتطرفة اللي كتخدم قطر وحكامها وتركيا وسلطانها٬ "الاتحاد العالمي لعلماء المسلمين" دار فتوى كاع. فيها ان التحالف مع اسرائيل "محرم شرعا".
البيان كان انتقائي بزاف. هاجم غير دول دون غيرها. جبد المغرب والامارات ووصفهم باللي نغامسو فالتحالفات والخطوات العملية "مع الكيان الصهيوني المحتل عمل مدان ومحرم شرعا وخيانة للعهد العمري، والصلاحي، ولحقوق الشعب الفلسطيني".
هاد الشي جا ساعات بعد توقيع المغرب لميموروندوم مع اسرائيل للتعاون فالمجال العسكري والامني.
هاد لقواويد ديال قطر والاخوان المسلمين ما قدروش يديرو ادانة وحدة لتركيا اللي عندها علاقة ديبلوماسية مع اسرائيل هادي سنوات وما قدروش يقولو كلمة وحدة على قطر اللي بدات التطبيع هادي سنوات مع اسرائيل واستقبلات قادتها فالدوحة واستضفات قادتها فقناتهم "الجزيرة". السبب بسيط ان الريسوني قادر يخون بلادو باش يدافع على قطر. على مصالح قطر الاستراتيجية حقاش هي اللي كتخلصو.
شكون وقع الاتفاقيات مع اسرائيل وامريكا ماشي عضو فنفس الجماعة اللي فيها الريسوني وهي الاصلاح والتوحيد واللي كان رئيس حكومة المغرب: سعد الدين العثماني. هادا ما قدرش يجبدو. هاجم بلادو زمن الحرب الباردة ماشي غير مع الجزائر كاينة تهديدات لامن بلادو من اكثر من جهة. لكن الدولار كيغير كلشي. قاليك رجل دين. هادا خائن لبلادو باش يطلق فيها فتاوى. حاول سنوات باش يهدم امارة المؤمنين باش امثالو يتحكمو فالشأن الديني وباش فشل مشى عند اللي كيخلصو وكان مكلفو بهاد المهام.