فضيحة كبيرة مع تسجيل اول "اوميكرون" فالمغرب. كيفاش كذبتو على لمغاربة وسديتو الحدود ودخلات هاد الحالة ومنين جات

وزارة الصحية قالت فبيان قبل دقايق باللي "تم تسجيل أول حالة إصابة مؤكدة بالمتحور الجديد لفيروس كورونا "أوميكرون" لدى مواطنة مغربية بمدينة الدار البيضاء" وباللي "توجد حاليا تحت الرعاية الصحية بإحدى المؤسسات الاستشفائية بالدار البيضاء" وباللي "تم التكفل بها وفقا للإجراءات الصحية المعتمدة، كما أن الحالة الصحية للمصابة مستقرة ولا تدعو إلى القلق"
بيان غريب وعجيب. ما جاوبش علي الاهم. ماشي تسجيل الحالة ولكن كيفاش دخلات الحالة. واش هاد المواطنة كانت برا مع شي وفد ولا تلاقات مع شي حد كان برا.
الوزارة اللي سدات بلاد علي قدها باش ما يدخل حد. دابا هادي اكثر من جوج سيمانات والاقتصاد ياكل لعصا بهاد الاغلاق وباللخر طلعات حالة. راه خاص محاسبة كاع اللي خداو هاد القرار ديال الاغلاق.
كاع بلدان العالم دازت ايام قليلة وشافو باللي هاد اوميكرون ماشي بالخطر اللي صوروه وفتحو بلاداتهم الا حنا. خلينا مواطنين مغاربة حاصلين برا على والو.
الوضعية الوبائية لحد الان مزيانة بالبلاد. ممكن تكون موجة جديدة ولكن العالم تعايش مع هاد الفيروس وعايش حياتو