قرارات غبية. الغاء المهرجانات عبث وزادو عليهم انشطة التلاميذ الفنية. كيفاش قرارات متناقضة. الوضعية الوبائية مزيانة ومنع غادي ويتوسع

قرار الحكومة منع المهرجانات الثقافية والفنية خطأ كبير. او على الاقل ما عندو حتى شي مبرر. البارح الاحد 05 دجنبر 2021 ووفق ما اعلنته وزارة الصحة تسجلات فقط حالة وفاة وتصاب 90 مغربي بكورونا خلال 24 ساعة. لمغاربة اللي دارو الدوز الثالثة وصل لمليون و760 الف واللي دار جوج وصل ل22 مليون و706 الف واللي دار وحدة وصل ل24 مليون و431 الف.
وصلات نسبة التعافي من نهار بدات كورونا 98 بالمائة ولم تتعد نسبة الفتك 1.6 بالمائة.
تصورو ف24 ساعة الاخيرة تسجلات فقط 3 حالات خطيرة والمغرب فيه 103 حالة فيها 5 فقط تحت التنفس الاصطناعي الاختراقي.
معطى اخر مهم على الوضعية الوبائية المزيانة هو ان معدل ملء أسرة الإنعاش المخصصة ل"كوفيد"يالله ف96، 1 بالمائة.
من نهار بدا هاد الفيروس والحكومة كتقول باللي الوضعية الوبائية هي اللي كتحكم فالقرارات للي كتخاد. دابا حنا فوضعية مزيانة بزاف. علاش هاد القرارات ديال تعليق انشطة ثقافية وفنية. اش من مبرر بناو عليه هاد القرارات.
الحكومة دازت من قرارات مبنية علي وضعية وبائية لقرارات استباقية ومشات بعيد فهاد الشي. مفهوم انها تغلق الحدود لفترة باش بان هاد المتحور اميكرون٬ ولكن اللي ما مزيانش هو تخلي لمغاربة حاصلين برا. هادي فضيحة كبيرة وشوهة كلشي ساكت عليها حكومة ومعارضة.
اللي ما مزيانش هو ان الحكومة تقرر تمنع الانشطة الثقافية والفنية للتلاميذ كيف توصلات مؤسسات اجنبية فالمغرب.
القرارات خاصها تكون مبررة. تبريرها كيكون غير بالوضعية الوبائية. اغلاق الحدود خاصو يتعاد فيه النظر بعد اسبوع منو. لحد الان ما مات حتى شي حد باميكرون وما دارش شي حاجة فشيشكل فشي بلاد.