اليوم تسجلات اكثر من الفين حالة اصابة بكورونا من اصل اكثر من 17 الف تحليل والوفيات وصلات 5. لكن اللي تغير بشكل كبير هو الطو دو بوزيتيڤيتي اللي طلع من 1 بالمائة هادي 4 سيمانات ل11.8 بالمائة اليوم. حسب الباحث فالصحة العمومية الطيب حمضي هاد الرقم هو المهم بزاف. الخبير توقع فتصريحو ل"كود" باللي من المتوقع٬ حسب تصاعد الارقام٬ نفوتو "طو دو پوزيتيڤيتي" اللي كنا وصلنا ليها مع "دلطا" فالصيف. كانت 25 بالمائة. الخبير توقع نوصلو ل30 بالمائة". واش دابا ايلى درنا مثلا 600 الف تيست فالنهار غادي يطلع لينا نفس الاف الحالات فالنهار؟ حسب حمضي الباحث فالصحة العمومية ل"كود" فهاد الشي ما كيتقاسش بهاد الطريقة. الخبير اوضح ل"كود" ان هناك جوج مؤشرات لمعرفة شحال عندنا من حالة. قبل هاد الشي وضح باللي اليوم اللي كيديرو التيست هما اللي عندهم الاعراض =غالبا يطلعو بوزيتيف= واللي تخالطو مع هاد الحالات. هاد الشي علاش من 17 الف اليوم مثلا طلعات 2000 حالة. المؤشر الاول: "طو دو پوزيتيڤيتي". دابا غادي ويطلع كيف اوضح وقرب اليوم تقريبا ل12 بالمائة. المؤشر الثاني وفق نفس الباحث ل"كود"٬ هو وضعية الانعاش. غير هاد الشي٬ يوضح حمضي٬ كيخصنا نتسناو تقريبا 4 سيمانات باش تبات هاد الوضعية. باش نعرفو النسبة ديال دخول الانعاش. فالصيف مع الضغط اللي دارو المتحور "دلطا" وصلنا ل50 بالمائة نسبة ملء اسرة الانعاش. الوضعية كانت خطيرة. مع هاد المتحور اوميكرون اللي كيعدي بزاف٬ يمكن ما نوصلوش لهاد الحالة. دراسات فبريطانيا وجنوب افريقيا وضعات باللي سريع الانتقال والعدوى ولكن ما كيرسلش للانعاش كيف اللي سبقو. دابا وصلنا لهاد الوضعية الوبائية اللي غادية وتتغير. وفين وزير الصحة ديالنا خالد ايت الطالب. هاد لوزير سد بلاد علي قدها باش يقنعنا باللي خاص نحافظو على "المكتسبات". كلنا عارفين باللي هادي تخربيقة. ما كايناش شي دولة فالعالم كتقول هاد الهدرة ديال المكتسبات الا عندنا. وزير كذب علينا وسد بلاد باش ما يدخلش اوميكرون واليوم غادية وتطلى بيه المدن المغربية واخر احصاء قالو لينا هي ان هناك 76 حالة مؤكدة و246 حالة مشكوك فيها. طبعا الرقم حسب ما جمعته "كود" اكثر بكثير وبزاف. واخا فشل فهاد الرهان ديال حماية المغرب من اوميكرون٬ مازال مصر مع الحكومة على اغلاق الحدود. قال ليك حتى 31 يناير 2022. هادي راها جريمة فحق الاقتصاد المغربي. جريمة فحق الخطوط الملكية المغربية. جريمة فحق السياحة المغربية. جريمة فحق عائلات حصلو افراد منهم فدول بحال اسبانيا وايطاليا وبلجيكا وهولندا وفرنسا ومازال برا. وصلو تقريبا لشهرين وغاديين يكملو الشهر الثالث. اغلاق ما عندو معنى. بايدن فتح حدودو مع جنوب افريقيا ودول اخرى خرج منها اوميكرون حقاش قال راه دخل عندنا وما بقاش مبرر نسدو. حنا عندنا عبقري اسمو ايت الطالب مصر يبقى ساد الحدود وحكومة قابلة هاد لفضيحة لوزير حاس براسو كثر من وزير حقاش كياصل بيه رئيس الدولة.
