اش هاد الحكومة. شي يسد شهر وشي يزيد شهر اخر. كيفاش مكتب المطارات يخرج قرار ووزارة الصحة مازال ما خرجاتش دراسة على اوميكرون ولمغاربة

قرار المكتب الوطني للمطارات البارح اللي فيه ان الحدود المغربية الجوية غادية تبقى مسدودة حتى 31 يناير ماشي غير كارثي على اقتصاد بلاد٬ بل فيه وقاحة من هاد المكتب. ما عندوش هاد صفة الاعلان على قرارات بحال هادي. كاينة الحكومة وفقط الحكومة. شكون سمح لهاد المكتب تكتب هاد الخبر؟ هادي وقاحة وترامي على سلطات مؤسسات حكومية. لكن هاد المكتب لقى الحكومة ما كايناش. ضصر وتصرف بهاد الوقاحة.
حسب مصادر "كود" فان وزارة الصحة اللي المفروض فيها تعلن قرارات بحال هادي بالاضافة الى الخارجية ورئاسة الحكومة٬ كتوجد دراسة على كيفاش كيتفاعل الجسد المغربي مع هاد "اوميكرون٬ المتحور ديال كورونا. الدراسة مازال خدام عليها معهد باستور. اذن كيفاش مؤسسة وطنية بحال مكتب المطارات تستبق كلشي وتخرج قرار غادي يكون عندو عواقب كارثية فالمقال الاول على الخطوط الملكية المغربية.
وحسب مصادر "كود" فان گاع القرارات اللي غادي تاخدها الحكومة غادية تبنى على هاد الدراسة بالاضافة الى دراسات اجنبية خاصة جنوب افريقية وبريطانية اللي دارت وقالت باللي هاد المتحور سريع العدوى ولكن ماشي عنيف وما كيرسلش اللي تصابو بيه للانعاش بالطريقة اللي كيرسل بيها المتحور "ديلطا".
اذن المندبة كبيرة والميت فار. علاش هادا الترهيب اللي دارتو الحكومة قبل وكملو مكتب المطارات؟ متحور ماشي بالخطورة اللي تصور. دول فيها 100 الف حالة يوميا وما سدوش بحالنا.
دابا كاينة عشوائية وارتجالية فاتخاد القرارات. المنطق كيقول خاص اي قرار يجي بتوصيات من اللجنة العلمية للحكومة. حنا بوحدنا فالعالم عندنا لجنة علمية ولكن ايلى قالت شي حاجة يسبها ويهاجم عليها وزير الصحة. همو الوحيد هو يبقى يتواصل بوحدو مع رئيس الدولة وما عرفناش اش كيقول ليه. كيعرف غير يسد. كيعرف غير يخلع. الكلفة ديال سياسة بحال هادي غادية تكون كبيرة على الاقتصاد المغربي.
خاص وضوح وشفافية فقرارات بحال هادي. دابا شي كيشرق وشي كيغرب