شبح زياش ومزراوي فالكاميرون. المدرب وحيد شرح ملح: اللي ما كيحتارمش التوني ما يمكنش يلعب مع المنتخب وانا كاين.. وما يمكنش نقبل من شي حد يقول راني اختاريت المغرب راه المغرب اللي كيختار ماشي اللعاب

صحافي فرنسي جبد مدرب الاسود وحيد خاليلوزيتش اليوم فالندوة الصحافية بعد ماتش المغرب وغانا عن اولى ماتشات المجموعة الثالثة للكان الكاميروني بمعلب احمدو احيدجو، وسولو على زياش ومزراوي.
وحيد رد بوضوح، وقال : "اللي ما كيحتارمش المنتخب. ما كيحتارمش المايو ديال المنتخب ما يمكنش يلعب فالمنتخب وانا كاين".
وعاود اكد اللي سبق رئيس الجامعة فوزي لقجع قالو فحوار قبل ايام: "راه ماشي قصة فلوس. هي قصة شرف. حتى حد ما عندو الحق يهين التوني. يديزونوريه. راه شرف ومسؤولية".
وحيد مشى بعيد وبحال ايلى بغى يسد هاد الملف مرة وحدة فرد واضح على زياش: راه ماشي زياش اللي كيختار. راه المنتخب اللي كيختار شكون يمثلو".
قبل ان يرد بوضوح اكثر:"ما يمكنش يلعب فشي بلاصة"، فاشارة الى ما قالو زياش باللي كان عندو اختيار يلعب فشي منتخب اخر.
وعبر خاليلوزيتش عن اسفو لهاد الشي واكد باللي خاص الموهبة تكون فخدمة الوطن.