واش حسو بالهزيمة؟. خصوم لشكر رفعو دعوى قضائية جديدة لتعطيل المؤتمر.. وقيادية ل"كود": لي بغاو يعطلو المؤتمر كانو تخلاو على الحزب فأوقات الأزمات

علمت "كود" من مصدر مطلع أن قيادة حزب الاتحاد الاشتراكي، انهت كل الترتيبات النهائية تنظيم المؤتمر الوطني ال11 أيام 28,29,30 يناير الجاري، رغم الدعوات القضائية المرفوعة ضد قرارات المجلس الوطني.
وحسب مصادر "كود"، فإن أنصار استمرار لشكر قادو كولشي من وسائل لوجستيكية والتنظيم، وعازمين يرشحو لولاية ثالثة لإدريس لشكر، الكاتب الأول الحالي.
ورغم أن حسناء أبو زيد وضعات يوم الجمعة شكاية في المحكمة الابتدائية ديال الرباط ،ضد في القرارات لي خرج بها المجلس الوطني ديال الاتحاد الاشتراكي اللي كان انعقد نهار 18 دجنبر 2021، إلا أن الاتحاديين مصرون على تنظيم المؤتمر في وقته.
وقالت مصادر اتحادية ل"كود" :"القضية لي فشي شكال، هي أن ابوزيد قدمات ترشيحها للمؤتمر باش تولي الكاتب الأول ديال الحزب، وفنفس الوقت باغة توقف المؤتمر".
وحسب معطيات "كود" المحكمة قررت الجلسة الأولى، نهار انطلاق المؤتمر، هنا غايطرا مشكل :"واش ابوزيد غاتمشي للمؤتمر ولا للمحكمة؟".
وكشفت المصادر نفسها أن أعضاء المجلس الوطني لي رفعو الدعوى القضائية الى جانب ابوزيد، كيتشركو في انهم مجمدين العضوية ديالهم في الحزب منذ سنوات، ومنهم لي دعوا فالانتخابات للتصويت على ضد الاتحاد الاشتراكي.
خصو لشكر، قال فنص الدعوة، بلي المؤتمر كان خاص يكون انعقد هادي أكثر من عام. لكن مقربين من لشكر ردو عبر "كود" بلي ميمكنش يدار شي اجتماع او مؤتمر لو صغير فعام الجايحة.
عضو من المكتب السياسي رحاب حنان صرحت ل"كود" بلي : "حسناء أبو زيد مشات هادي خمس سنين فاش كان الحزب في وضعية صعيبة، كانت نتائج انتخابية صعيبة، وكان الوضع التنظيمي خايب شوية، ديك الساعة حسناء مشات لانه لم تكن توزير اي كانت باغت تولي وزيرة، وبقاو المناضلين كيتقاتلو، واخا المعيور والاتهامات، وكلشي كيقول الاتحاد الاشتراكي مات، وحتى حسناء قالت هاد الشي فدوزيم قبل الانتخابات، دابا فاش الحزب دوبل المقاعد ديالو، وفاش تزادو فروع ووقف على رجليه، عاد بغات تحصد ديك الشي لي حرثوه لوخرين".
عضو المكتب السياسي ذكرت بلي الاتحاد الاشتراكي عقد حوالي عشرة ديال المجالس الوطنية منذ ماي 2017، واليوم كاين في طعن في دورة تعتبر اخر دورة قبل المؤتمر، هي ولي رفعو الدعوى معها، وأنها تتناقذ فاش كتقول المجلس الوطني مكانش بخبارها، في حين هي عمرها ما طالبات تحضر للمجلس الوطني في الدورات السابقة ..
وأضافت :"بغيت ناكد أن الدعوة للمجالس الوطنية تتكون منشورة في اعلام الحزب، وحتى في بزاف ديال المواقع والجرائد، وكانت نقاشات حتى فالسوشل ميديا".
وختمت رحاب بالقول" الله ياودي، الصحافة كلها كانت حاضرة ديك النهار من الصباح أمام مقر الحزب، فكيفاش العالم كامل فراسو وهي وهادوك لي رافعين الشكاية معها مفراسهومش !!! واهتمام هذا بالحزب".