حنان رحاب كتشرح وتملح فحوار مع "كَود": لشگر كيتعرض لبزاف ديال التهجمات وسي نورمال ندعمو

1- "كَود": شفتك هازة سيفك واللي انتاقد قرار برلمان الحزب الأخير تنوضي ليه؟
حنان رحاب: هادشي فيه عكس الآية، حيت ماشي غير الانتقاد اللي كاين لقرارات المجلس الوطني الأخير، بل التهجم المنظم، واش حلال على شي وحدين يسفهو قرارات اتخدات بأكثر من 200 عضو فالمجلس الوطني، وماشي من حقنا نقولوليهوم راكوم غالطين، ومن غير المؤتمر، فالمجلس الوطني هو أعلى هيئة منتخبة في الحزب، وبالتالي: شكون الديموقراطي؟ اللي كينضبط لقرارات اتخدات بالتصويت بعد نقاش، ولا اللي كيتهجم في السوشل ميديا، والإعلام، وفين ما تمد ليه ميكرو، بغيت نفهم هادو اللي دكرتي، مع احترامي هوما من طبقة النبلاء، وديك 210 اللي صوتت فالمجلس الوطني الخماسة عندهوم، ولا كيفاش؟
2- "كَود": واش ولاية ثالثة لادريس لشكَر غادية تحل المشكل؟
حنان رحاب: الاتحاد الاشتراكي حالته التنظيمية وموقعه في الخريطة الحزبية ماشي بهاد السوء اللي كيحاولو يصوروه، عندنا مشاكل بحال الأحزاب كلها، ولكن وضعنا أحسن من أحزاب كثيرة حتى حد ما كيجبدها، ولذلك كنقولو بوجه احمر أن ادريس لشكَر نجح في جوج مهمات صعاب: اللولة داخلية حيت قدر يوسع الحزب تنظيميا وقدر يدير مصالحات اللي رجعت بزاف دالمناضلين للحزب أكثر بكثير من هادو اللي كتقدموهوم على أساس أنهم غاضبين، مع العلم أن السياسة ما فيهاش الغاضبين وبالتالي ما خاصش يكون فيها التحزار.
والثانية: انتخابية حيت تزادت أعداد منتخبي الحزب بنسبة 70%.
طبعا، طموح الحزب أكبر من هادشي، ولكن اعتبرنا أن خدمة كبيرة تدارت، وخاصها تكمل، وحيت ما لمسناش بلي شي حد من اللي عبرو على رغبتهم فقيادة الحزب مستوعب فين حنا تنظيميا وسياسيا، وفين باغين نوصلو بعد 5 سنين، وحيت لقينا بلي تطبيق القانون الداخلي المتعلق بحصر الولايات في جوج خطرات، غيفرض علينا نبدلو أغلب مكاتب الفروع والجهات وماشي غير مؤسسة الكتابة الأولى، وهو عمل ماشي ساهل، قدرو بعض الإخوان يديرو تعديل في القانون اللي يسمح بمرونة تمكن الحزب من الاشتغال في أريحية، من أجل أنه يكمل المهام اللي مزال مطروحة.
3- "كَود": حسنا أبو زيد مشات للقضاء وبوبكري انتاقد تغول لشكَر والشامي طعن فقرار برلمان الحزب الأخير.. واش ماشي ضروري يتفتح نقاش بين المرشحين باش تجاوزو هاد الخلافات؟
حنان رحاب: بالنسبة ليا ماكاين حتى مشكل في فتح حوار سوا بين المرشحين، وماكاين مشكل حتى فالمناظرات قدام المناضلين والحمد لله التقدم الرقمي سهل الأمور، ولكن مايمكنش تقولي حوار وانت كتسبني، وانت بينتي على سوء النية فخوتك، وجبتي مفوض قضائي ونتي كتحطي ترشيحك، وانت كتهدد باللجوء للقضاء، وحنا مع اللي غيقول القضاء، وانت كتبخس 210 واحد من المجلس الوطني وتتهمهم بلي مسخرين، وحتى منتخبي الحزب اتهموهوم بلي طلعو بطريقة مشبوهة، غير قولي هادو إذا شدو الحزب، مع من غيخدمو؟
4- "كَود": علاش كدافعي على لشكَر وبزاف ؟
حنان رحاب : كندافع على الحزب اولا، وثانيا على خط داخل الحزب، وثالثا على مهام كنعتقد بلي محتاجة للفريق اللي خدم ودمر عليها هادي 5 سنين، ورابعا الأخ لشكَر، اللي ماشي مرة ماشي جوج اختلفت معه في تقدير سياسي معين، ولكن كنشهد بلي كان عندو الدور الأكبر في ما نحن عليه دابا، وشوف حال الأحزاب اليسارية ونتائجها في الانتخابات، وعدد منخرطيها، في المغرب أو في دول الجوار، وقارنها بالاتحاد، باش تفهم علاش كندافع على هاد الرجل اللي كيتعرض لبزاف دالتهجمات وكيصبر من أجل الحزب. وعموما إذا قارنت أنا لشكَر بباقي المرشحين سي نورمال ندعم لشكَر، حيت هو اللي كان معنا وماعمرو خلا الحزب ومشا يرتاح.
5- "كَود": آش من اتحاد كتوجدوه للسنوات الجاية وعلاش كيبان ليك باللي جمع اليسار صعيب؟
حنان رحاب: الاتحاد اللي بغيناه في المرحلة المقبلة هو اللي يكون الحزب اللول أو الثاني في الانتخابات الجاية، وأنه خاص يقود الحكومة أو يكون على الأقل رقم وازن داخلها، مابقيناش باغيين نكونو رقم مكمل فقط، هذا طموحنا، وحيت ببساطة هذا هو دور الحزب، هو الوصول لمراكز تدبير الشأن العام باش ينزل برنامجو، أما اليسار فماشي أنا اللي كنقول صعيب يتجمع، راه الواقع هو اللي كيقولها، واللي كيقول العكس غير إما كيحلم أو كيدغدغ مشاعر اليساريين والمتعاطفين معهم، راه حنا ما متفقين لا في الموقف من النظام، ولا الانتخابات، ولا الدستور، ولا أشكال التنظيم، وراه كاين اللي كيعتبرنا حنا ماشي يسار كَاع.. إذا قدرنا نتحاورو كيساريين ونسقو في المشترك راه تبارك الله.. وزايدون في العالم كلو ماكاينش وحدة أحزاب اليسار إلا في دول الحزب الواحد..