141 دولة دانت غزو روسيا لاوكرانيا. الرباط ما مع ما ضد ما متانعات: ها اش دارت وها علاش

صوتات الجمعية العامة للامم المتحدة قبل قليل على مشروع قرار كيدين روسيا لغزوها لجارتها اوكرانيا. القرار فيه مطالبة لبوتين بالانسحاب الفوري من هاد الاراضي.
هاد القرار "غير ملزم" اي انو ما غادي يغير والو علي ارض الواقع. روسيا غادية تستمر فغزوها لاوكرنيا. الغرب كيتاهم موسكو بخرق المادة الثانية من ميثاق الأمم المتحدة، التي تمنع الدول الأعضاء من التهديد باللجوء للقوة أو استخدامها لحل الأزمات٬ لكن هي كتقول راها اجراءات قانونية وكتجبد المادة 51 من الميثاق، اللي فيه الحق فالدفاع عن النفس.
القرار صوتو عليه 141 دولة و5 كانو ضدو و35 غابو. المغرب ماشي مع هادو كاع. وفق ما نشرته الامم المتحدة بخصوص تصويت الدول٬ المغرب ما كاينش. دار بناقص وغاب. ما غايش يمتانع او يعارض او يوافق. اللا ما شاركش اصلا.
الرباط كانت عبرات فبيان رسمي قبل ايام جا فيه "المملكة المغربية تتابع بقلق تطورات الوضع بين فيدرالية روسيا وأوكرانيا" وفيه ان الرباط تجدد "دعمها للوحدة الترابية والوطنية لجميع الدول الأعضاء في الأمم المتحدة" وباللي كنتشبتو "بمبدأ عدم اللجوء إلى القوة لتسوية النزاعات بين الدول، ويشجع جميع المبادرات والإجراءات التي تسهم في تعزيز التسوية السلمية للنزاعات".
هاد القرار كيجي بعد اسبوع من قرار فشل فمجلس الامن كيدين روسيا بسباب الڤيتو اللي دارتو.
بسباب الصحرا وتبعات موقف مغربي من روسيا على هاد القضية الوطنية، ختارت الرباط هاد الطريقة.
موقف غادي يجبد لينا الصداع مع الغرب خاصة امريكا اللي قادت العالم ضد روسيا.