مور فضيحة "شراء 11 ميرسيديس غالية لأعضاء مكتب المجلس".. ميارة وظف 20 مستخدم جديد فالمستشارين.. ومصدر ل"گود" : كاين اصلا 400 موظف وشي خدام وشي سالت ومكاينينش مكاتب فين يخدمو

علمت "گود" من مصدر مطلع أن النعم ميارة رئيس مجلس المستشارين، زاد فعدد الموظفين بالمجلس واخا هاد المؤسسة عامرة بهم، بدل ما ينقص منهم ويشيط من المال العام، زاد فيهم.
وحسب معطيات "گود"، النعم ميارة لي داير ما بغا فهاد المجلس، كيقرر بلا ما يتشاور، زاد 20 موظف جديد فهاد المؤسسة.
"گود" دارت سبق ف الفوضى لي كاينا وسط المجلس، فحسب مصدر "كود" فإن ما يقارب 400 موظف خدام فيها، فيهم طبعا لي غير كيتجول حدا شارع محمد الخامس واللي عاينتهم "گود" وفيهم طبعا لي معندوش بيرو فين يجلس وفيهم لي باقي عجبو العمل عن بعد ومسلكو.
فمجلس المستشارين كاينا دبا كثر 400 موظف ل120 برلماني فالمجلس، يعني كل مستشار برلماني عندو كثر من 3 موظفين، فالمقابل العدد فمجلس النواب اللي فيه 395 نائب، قليل، تقريبا موظف لكل نائب، ورغم ذلك كتلقاو مجلس النواب محرك مزيان الدبلوماسية الموازية وخدام مزيان.
ف المستشارين موظفين بلا شغل والاشباح وباك صاحبي وروينة فالتوزيع كتعرقل عمل البرلمان.
دبا من غير هادشي، ميارة ختار طريقة غريبة عن العمل المؤسساتي وهي أنه شد كولشي فيدو، تفويضات وتوقيعات واختصاصات.
هاد الفضايح كيتزادو لفضيحة كبيرة، بحيث في أوج الأزمة مجلس المستشارين، ميارة شرا 11 سيارة "مرسيدس" فاخرة بأزيد من نصف مليار لفائدة أعضاء مكتبه، والخبر لي نشراتو الأخبار قبل وثم اليوم 24 لي عطات فيه تفاصيل إضافية.