عبث هاد الشي. الكونگوليين خواو مطار كينشاسا وخلاو المغاربة بلا خدمات. مشاو على رجليهم حتى طلعو للطيارة وتكلفو ريوسهم بالمراقبة – فيديو

هاد الصباح مع لحداش لمطار محمد الخامس وصلات اخر طيارة من الطيارات التسع اللي داو جمهور الاسود للعاصمة الكونغولية كنشاسا. رجع الجمهور بعد ما دارت فوضى كبيرة البارح بعد الماتش فالمطار.
https://web.facebook.com/watch/?v=786325545659129&extid=NS-UNK-UNK-UNK-IOS_GK0T-GK1C&ref=sharing&_rdc=1&_rdr
عانى الوفد الرسمي =لعابة وتقنيين واداريين وجامعة= فهاداك المطار وبقاو شي 3 سوايع. من بعد كانت معاناة الجمهور اكبر. وفق شهادات "كود"٬ مشات طيارات مغربية مع هاد الفوضى وخلات شي جماهير تماك.
ما كانت حتى شي حاجة من الخدمات. لا اللي مكلف بمراقبة التذاكر لا وسائل النقل" يحكي احد الجمهور ل"كود". فطيارة دريم لاينر اللي جات لكازا مشى تقريبا شي 300 واحد على رجليهم فالبيست حتى وصلو للطيارة. تماك تكلفو شي وحدين من الجمهور وبداو كيراقبو. اللي مع عندو بيي فيها رقم الرحلة يطلع واللي ما عندوش يمشي فحالو" يوضح مصدر "كود".
طبعا مع الفوضى قلعو شي طيارات قبل الوقت. بقى بنادم تماك حاصل. هادا وزعوه لمغاربة بيناتهم "فغياب تام لناس المطار. درنا خدمة يدينا وجبنا كاع لمغاربة اللي مشاو. ما خلينا حد" يضيف مصدر اخر ل"كود".
صحاب "لارام" هدرو على مجهود خرافي باش تنظم رحلات وتشرف عليها فوقت قياسي. رسلو شاف ديسكال حقاش كان عندهم غير واحد. طبعا كانت مشاكل فشي طيارات بحال اللي وقع فطيارة مشات من كازا وكانو غاديين يضاربو مع ليكيباج بعد ما لقاو ليكرون والضو خاسر او خلاوه مطفي.