الوزيرة بنعلي مبغيناش الشوكلاط ديالك: هدري مقادة ولا ما كتعرفيش الدارجة باش تجاوبي ما تستحقيش الوزارة

فأول لقاء اعلامي دارتو لوزيرة الانتقال الطاقي والتنمية المستدامة، ليلى بنعلي، اليوم الجمعة فصباح، كان سيء فالتنظيم، خلاو صحافيين قدام فالحرفة وصحافيين فمواقع معروفة يتسناو شكون يدخلهم للندوة حيث سمياتهم مكايناش فواحد لاليست معرفناش شكون دارها ولكن باينا لاليست قديمة حيث فيها غير عينة من الجرائد. حتى الوكالات العالمية ما خلاوش صحافييها فاللول يدخلو
دبا التواصل عند الوزيرة هو توزع الشكلاط على الصحافيين كيف وقع اليوم بعد نهاية ندوة الصباح بمقر وزارة الانتقال الطاقي، حنا ف"كود" كنقولو ليها مبغيناش شكلاطك. ما خديناهش وما بغيناهش.
الوزيرة لي قالت فالبرلمان بلي قادا على كولشي، تشد كولشي تا هيئة ضبط الكهرباء وغيرها وعطاتها للانشاء ومخلية هاداك المكتب ديال الضو والما كولو فضايح، اليوم مقداتش تا دير ندوة صحافية محترمة، جابو صحافيين لقاعة صغيرة مكيانش سؤال جواب، اسئلة مجاوباتش عليها.
كاين صحافيين بالدارجة بغاو اجوبة بالدارجة وكاينين صحافة فرنكفونية بغاو اجوبة بالفرنسية، غير هادي مقاداتش تجاوب كل واحد على سؤال وعلى اللغة للي كتقرا عندو او للي كتشاف فالفيديو ديالو. خلط الفرنسية بالعربية واحيانا هضرات بالفرنسية كثر من العربية.
دبا بنعلي كتقول هادي وزارة خصها تكون قافزة.. كيفاش بغيتيها تكون قافزة وهي تبدا اول لقاء مع الصحافيين بهاد التصرف قليل الادب؟.