ها علاش خاص مسؤول "الاخوين" يتحاسب . واش تشاور مع اعضاء مجلس ادارتها قبل ما يجيب المتطرف العمري ودخل هاد الكارثة ف"الانفتاح" وهاد الاعضاء فيهم مستشار الملك ومدير كتابتو الخاصة ووزراء وكبار رجال الدولة.. ها اللائحة

فضيحة دعوة جامعة الاخوين لصاحب فكر متطرف بحال ياسين العمري قبل يومين كبيرة بزاف. الجامعة دخلاتها ظلما وحقارة منها فخانة "الانفتاح". دابا خاص هاد صحاب "الانفتاح" يجيبو كاع دواعش العالم ومتطرفيه ويدخلوهم للحرم الجامعي.
دابا هاد الجامعة بلا ما تبدا تكذب علينا وتقول راه جمعية الطلبة. هادي ما شاداش. المتطرف مدعو من الاخوين. احتفلات بيه الاخوين. جابتو جامعة فعز هجومو الحقير على الاعلام وعلى لالياتو الشيخات. الشيخات منتوج مغربي خالص. كلو تمغرابيت. هو فكرو وعقليتو وذهنيتو ماشي مع المغرب. بحال هاد المتطرفين حتى مفهوم الدولة الوطنية ما كيآمنوش بيها. كيأمنو بالامة. يعني قادر يسبق مصالح دولة بحال تركيا او قطر او غيرها على مصالح بلادو الحيوية.
رئيس الجامعة مسؤول على هاد لفضيحة لكبيرة. دابا خاصنا نعرفو واش المجلس الاداري لهاد الجامعة قابل لهاد التوجه المتطرف للادارة الحالية. واجيبو شوفو شكون بعدا فهاد المجلس.
فيه عن الديوان الملكي مستشار الملك اندري ازولاي ومدير الكتابة الخاصة للملك محمد منير الماجيدي. وعن الحكومة فيه وزراء الداخلية والخارجية والتربية الوطنية والتعليم العالي والبحث العلمي والمالية والاقتصاد والتجارة والصناعة والاستثمار ووالي بنك المغرب ومديرة المكتب الوطني للهيدروكاربونات والمعادن ومدراء عامون لكل من البنك الشعبي والتجاري وافا والقرض الفلاحي والقرض العقاري والسياحي ورئيس لجنة المالية والميزانية ورئيس الباطرونا والرئيس المدير العام للمكتب الشريف للفوسفاط وصندوق الايداع والتدبير واتصالات المغرب زيد عليهم شي شركات خاصة وعاد الاجانب من الكويت وامريكا ...
دابا هادو خاصهم يخرجو ويقولو لينا واش واقفو لهاد رئيس الجامعة يدعشش "الاخوين".
هادي فضيحة كبيرة فجامعة كانت نور وسط ظلام جامعي. دابا ولات حاملة لهاد الظلمة