بسباب تدوينة لاخنوش بالدارجة: دارجتنا هويتنا وخط حمر وعمرنا نفرطو فيها وما ايخلعوناش صحاب الولاء للمشرق

بنادم باقي ف2022 كيحكر الدارجة المغربية، بعد كل هاد السنوات ديال الحرب عليها، من اللي يسوا واللي ما يسواش، من الضلاميين والعروبيين واللي ما لاقي معامن يتحارب ولا اللي نساهم التاريخ، وكيعتبرها لغة هامشية، ومضيع وقتو يسطر بالأحمر.
باش نوضعوكم فالصورة اسلاميون واسلاميات خاصة صحاب العدالة والتنمية وحتى شي وحدين خراين ناضو كينگرو على عزيز أخنوش بصفتو الشخصية، علاش يدوي بالدارجة فالصفحة ديالو. ومالكم. يهدر باش ما بغى. الدارجة راها لغتنا. راها هويتنا.
ومالها الدارجة يا صحاب البي جي دي ا؟ اش فيها كاع تكون وسيلة تواصل؟ مجد سياسي جن بحال بنكيران دار حقاش كيهدر بالدارجة مع لمغاربة. اسلامي دار الدارجة. علاش يا الاسلاميين ما درتوش فديالكم.
حتى حد ما كيقول المغاربة ما كيفهموش العربية، وباواتنا وجدودنا ما كانوش قاريين وكيسمعو لإذاعات ويتفرجو فقنواة ناطقة بالعربية وكانو كيفهموها. ولكن ديك العربية اللي غزاتنا من الشرق بهاد وسائل الإعلام راه كدوز لينا السم بين سطورها. هي اللي وصلات اللحايا بگاع انواعهم.
الدارجة ما جاتش تعوض شي لغة، الدارجة فن. "لغة" حية، زوينة فنة واعرة، الحب ديال حياتي، وماشي لغة زنقاوية، حيت كندويو بيها مع ولادنا وواليدينا، ماشي كندويو بستيلو حمر فقلب الدار، ويلا دوا بيها رئيس الحكومة فصفحتو اش فيها؟ علاش ما نوضوش نغوتو ملي كيدوي بالأمازيغية ولا الفرنسية ولا الإنجليزية، علاش هاد الحكرة اللي حاكرينا هاد المغاربة العروبيين الرجعيين.
هاد الاسلاميين كون تكتب فصفحة اخنوش بالفرنسية كون ما هدروش.
الدارجة لغتنا. جامعة كل لغات العالم، هي اللي كتعكس هويتنا وشكون حنا. ويلا بغيتو حتى هاد المتنفس تقمعونا فيه، وتخليونا نكرهو راسنا راه والله لا تفاكينا معاكم فدرجتنا.
درجتنا لغتنا الأم، وهي اللغة الرسمية ل"كود" وهاد الشي كافينا باش نتاحربو معاكم على قبلها.