التلفة. رئيس حكومة ولى اكبر مشكلة للبلاد. غادي يضرب اللي دارو المغرب كولو فزيرو. رئيس الحكومة داز فضيحة كبيرة مع لحبيب المالكي باش حدد يجي نهار 11 يونيو لمجلس النواب باش يناقش برنامج الحكومة لرفع حالة الطوارئ الصحية. علاش فضيحة. حقاش الحكومة قالت باللي الحجر الصحي غادي يسالي نهار 10 يونيو. طبعا كاين فرق بين حالة الطوارئ الصحية والحجر الصحي. مصدر رسمي كان اكد ل"كود" قبل ايام باللي "الحجر الصحي" غادي يحيد بتدرج وان "حالة الطوارئ الصحية" غادية تمدد. المشكلة ان رئيس الحكومة كان خاصو٬ كيف كيدار فالدول اللي كتحتارم مواطنيها٬ قبل تاريخ انتهاء الحجر الصحي باش يقدر استراتيجية حكومتو للخروج من الازمة. دابا هاد رئيس الحكومة اللي بان بعيد على تدبير هاد الجايحة ما قدرش ياخد المبادرة ولو مرة. ما قدرش يطلب المعطيات ويخرج. كيدير تصريح كيجي وزير كيصحح ليه او يدير تصريح مختلف عليه كليا. دابا كاينة نقطة هي مسألة حياة او موت للمغرب وهي فتح الحدود. هنا حتى حد ما عارف. شي تسريبات كتقول باللي حتى لشهر شتنبر. مالين هاد التاريخ خاصهم محاكمة. كيفاش كيفكرو. كاع بلدان العالم مضاربة على تجيب السياح وحنا سادين على راسنا. ايلى بقينا حتى وسط يوليوز راه ممكن "لارام" تموت اما حتى شتنبر بزاف عندو علاقة بالخارج غادي يموت. تونس بحالنا ياك؟ راه رئيس حكومتها قررر يفتح الحدود البحرية والجوية ابتداء من 27 يونيو. قبل من اسبانيا. اش كيعني هاد الشي؟ ان تونس غادية تكون موجدة باش تستقبل سياح اللي كتنافسو بيناتنا على نفس الاسواق. اوربا من المتوقع تفتح حدودها الداخلية اي حرية حركة تنقل المواطنين اللي من الاتحاد الاوربي بداية شهر يوليوز. 15 يوم قبل اي 15 يونيو غادية تفتح فرانسا وبلجيكا والمانيا الحدود بيناتهم. اسبانيا كتقاتل باش تفتح الحدود. عارفة ان اغلاقها يعني قتل لبلاد اللي كتعتامد على السياحة بشكل كبير. ايطاليا سبقات كلشي. هاد الدولة اللي ضرباتها مزيان الجايحة واقتصادها بحال اقتصاديات دول اوربية اخرى٬ معول على السياحة. ايطاليا بدات تستقبل فالسياح هاد السيمانا. تركيا بدات خطوطها الجوية خدامة داخليا وغادية تبدا رحلاتها الدولية لاربعا 10 يونيو اي السيمانا الجاية وغادية تمشي ل40 دولة. هاد الشي كولو وشي متخلفين فالتدبير فالمغرب مازال ما قالو والو. مازال ما هدروش على برنامج رفع الحجر. مازال ما تكلموش على فتح الحدود البحرية والبرية. واش باغيين البلاد توقف. الاخبار اللي كتهدر على فتح الحدود البحرية والبرية ف15 يوليوز مازال ماشي متأكدة اولا وثانيا راها معطلة على بلاد يالله فيه لحد الان 8 الاف حالة وياللاه عدد القتلى وصل 208. باستثناء تونس وشوية تركيا٬ گاع الدول اللي قررات فتح الحدود البرية والبحرية ماتو فيها كثر من 26 الف. مناش خايفين. علاش ما كنهدروش على اش وقع وفين غاديين.
