كشف نجم الراي الشاب خالد، أن سبب اختيارو للقب "الشاب" اللي سابق سميتو هي بسباب خلاف وقع بينو وبين أول شخص سجل ليه الأغنية المشهورة "طريكَ الليسي" وهو فعمرو 14 لعام. الشاب خالد (62 عام)، اللي سميتو الأصلية هي "خالد الحاج إبراهيم"، قال فبرنامج "مع الشريان"، ديال قناة "mbc1′′، أن الخلاف كان على الإسم الفني بينو وبين منتج الأغنية، واللي تعصب عليه فديك الوقيتة وقال ليه فاللخر "سير أهيا الشاب"، يعني كان قصد يعايرو بصغر العمر ديالو، لكن هاد "المعيورة" غادي تقلب لحاجة إيجابية وغتولي كلمة "الشاب" هي اللقب ديالو والإسم الفني اللي غيحيح بيه فالكاريير ديالو وبيه غيتشهر. الشاب خالد هضر على مسيرتو الفنية فنفس البرنامج وقال بللي أنجح أغنية فالكاريير ديالو هي أغنية "ديدي"، واللي توزعات فأكثر من 40 دولة، وكانت مداخيلها، فاش خرجات، فاتت حتى إيرادات أغاني النجم العالمي الراحل مايكل جاكسون. وقالو بعض المتتبعين بأن معظم المعلومات اللي قالها الشاب خالد فبرنامج "مع الشريان" معروفة عند الجمهور ديالو، خصوصا فالمغرب والدزاير، ولكن فالمقابل أكيد أن فيها الجديد بالنسبة لباقي الجمهور فالمنطقة العربية.