منهم الرايس جو بايدن ومارك زوكربوركَ وموركَان فريمان.. روسيا منعات أكثر من 900 ميريكاني يدخلو أراضيها – فيديو

نشرات الحكومة الروسية وثيقة فيها سميات ديال 963 شخصية ميريكانية ممنوع عليهم دخول روسيا وأولهم الرئيس الميريكاني جو بايدن وحتى الممثل الأسطورة موركَان فريمان، هادشي كامل باش ترد على الحملات الإعلامية اللي كاينة ضدها، وأيضا على العقوبات اللي فرضاتها عليها واشنطن بسباب الكَيرا فأوكرانيا.
شبكة "سكاي نيوز" البريطانيّة قالت أن سبب منع السلطات الروسية لموركَان فريمان (84 عام) جا بعدما شارك ففيديو ترويجي كيتاهم فيه روسيا بالتدخل فالديمقراطية الأمريكية ومحاولة التأثير على الانتخابات فبلادو عام 2017.
وبالإضافة لبايدن وموركَان فريمان حطات روسيا فنفس لاليست ديال الممنوعين الرئيس التنفيذي ديال شركة "فايسبوك/ميطا" مارك زوكربيركَ، وعدد من المسؤولين فالإدارة الأمريكية الحالية بحال نائبة الرئيس كامالا هاريس، ووزير الخارجية أنطوني بلينكن، ووزير الدفاع لويد أوستن، ووزير النقل بيت بوتجيكَ.
و قالت بعض وسائل الإعلام فميريكان بللي الرئيس السابق دونالد ترامب ماكايناش سميتو مع هاد الممنوعين.
لاليست الروسية تدارو فيها سميات ديال شخصيات ماتو أصلا هادي مدة منهم السيناتور الراحل جون ماكين.
وحتى صوفي كَريكَوار ترودو، مرات رئيس الوزراء الكندي جاستن ترودو تدارت مع الميريكانيين فنفس لائحة المنع من دخول روسيا.