فاتي جمالي تكتب ل"كود": عيد الام كيستفزني. تكرفصت فالطلاق واخا عندي الحضانة ومكلفة بولدي فكلشي خاصني نتسنى ورقة من الراجل باش نخرج ليه لاكارط ناسيونال. اش هاد القانون وها رسالتي لوهبي

گاليك "عيد أم سعيد". الأم ما محتاجاج نهار نكتبوا ليها جملة فمواقع التواصل الإجتماعي. المرأة والأم محتاجة نعطيوها أبسط حقوقها محتاجة المساواة لي ديما كنت كنسمع عليها ولكن مع الأسف مكيناش. إيلى كنت أنا كأم ما عنديش الحق ناخد لاكارط ناسيونال ولا الباسبور لمجرد أنني مرأة ولكن الرجل يقدر ياخدو بلا موافقة الأم (فين هي المساواة) كيقولك اللا لمرا تقدر تهرب بولدها. علاه شحال من راجل هرب بولادو وخلا المرأة غادية تحماق.
انا مع المساواة. الحقوق للي تعطي لأب تعطي للأم. أنا كأم حملت وتوحمت وتكرفصت فالحبالة وفالولادة وفرضاعة (بحال كاع الأمهات ) وتكرفصت فالطلاق وعندي الحضانة بالإتفاق. اليوم كنضرب تمارة على ولدي وكنصرف عليه٬ بحالي بحال بزاف الأمهات المغربيات القادات للي تيهزو ولادهم بسنانهم٬ خاصني تتسنى ورقة من عند الراجل٬ حيت الحيوان المنوي ديالو (بلاما تصدموا من الجملة لأنو هدا هو الواقع ).
أنا ما عنديش مشكل مع الشخص قد ما عندي مشكل مع القانون لي خصو يعطيني قيمتي فالمجتمع. هادي شهور ولدي بلا أوراق و دابا خصني نطلع ونهبط فالمحاكم باش ناخد هاد الحق لمجرد أني مرأة. المجتمع ما سولنيش شكون يوكل ويقري ومكلف بهاد الولد. طبعا كندير واجباتي وانا فرحانة.
كنتمنى من وزير العدل عبداللطيف وهبي يكون عادل. كحقوقي مهتم بالقضايا الأسرية والمهنية وحقوق الإنسان٬ خاصو يعطي الأم حقها.
عارفة باللي المشكلة ديالي بسييييييطة مقارنة بمشاكل اعقد كتواجهها المرأة لمجرد انها كذلك. كتعيش فمجتمع ذكوري.
اش من عيد كيتهم للمرأة للام. صعيب تكوني كديري كاع المهام الحياتية وتعتابري راسك قوية وفاللخر تلقاي راسك غير زايدة فهاد الكرة أرضية.
منذ شهور وفمي كياكلني باش نهدر على الموضوع وكنت ديما كنتردد ولكن عيد الأم ستفزني.