بحكم أنني الكاتيب الوحيد فالأسرة والعائلة والحومة ( دوار بلعكيد بأسره)، فالواليدة ديما كتسولني الى مفهماتش شي حاجة، واخا مؤخرا شرات راديو وولاو عندها العلامة كتار فالكوزينة، وكيفهمو فكولشي، لدرجة المكانة ديالي كفهماتور بدات كتزعزع عندها، نافسوني علماء التنمية الذاتية والعشابة ، حتى جات عندي واحد النهار كتستفسر علاش النمرة ديال واحد الفاهماتور مكتشدش ليها، بينما الناس الخريين كتشدليهم وكيطرحوا استفساراتهم، ديك الساعة حسيت بالإهانة حسيت بالإحتقار، جمعت الوقفة وشديتها من دراعها وقتليها : الواليدة أنا كاتيب كنفهم فكولشي كاتيب فكود اكبر تجمع ديال العلماء، الواليدة راه كنكتب انا وحميد زيد فمنبر صحفي واحد، بقاي تسوليني علاش غادا تسولي واحد آخر ، وزايدون حتى الى مجاوبتكش انا غادي نسول كوكل ، شتي هاداك المشقوف لي ديما خاشي راسي فيه راه فيه كولشي، راه كيغرفك حتى نتي وكيعرف جدودك راه دابا نكتبوا ولاد سعيد فكوكل ويعاودليك على جدودك ويعرفك ببلادك كثر ملي نتي عارفاها. ومن بعد مرجعات الثقة ديالها فيا شوية، حيث وريتها عدد البارطاج والجيمات لي كنجني يوميا، وشرحتليها أهمية الجيم فالمجتمع الحديث، فاجآتني بسؤال كان دائما يقض مضجعها(بالإظافة للواليد)، وليدي هاد ليام كنسمعهم كيدويو على الإنتخابات ولكن مابانو ليا زرود فالحومة ماجا داق علينا الرئيس(من أجل تجديد البيعة)، مابانو ليا وراق مليوحين فالشارع، ديالاش هاد الانتخابات؟ هادوك الواليدة ديال الغرف، غرف آش؟ الإنعاش؟.. غرف التجارة والصناعة داكشي ديال لحرايفية الواليدة السكالسة والحوانت وداكشي، وهوما لي كيكونوا فمجلس المستشارين. الصراحة ماجاوبتهاش شي جواب مقنع حيث أنا براسي ماعارفش، عرفت كولشي إلا هادي فلتات ليا، درتها فكوكل مالقيتش تعريف ديالها طلعوا ليا غي أخبار عليها فموقع كود، ولكن تعريف خاص مطلعش، أواه واش هاد الإنتخابات سرية حتى لهاد الدرجة، اذن فيها الهمزة، كون مكانتش فيها ماياخدش غمارها رجال اعمال بحال الدرهم، كاينة ريحة ليدام تما، بالنسبة العديد هاد الإنتخابات ديما بقات مجهولة وسرية بين طائفة معينة، وحتى ملي كتسمع أن الفلوس تعطاو فيها كتبقى تتسائل فين وكيفاش، وحتى لمؤخرا كاع ومكنتش عارف الطريقة باش كيوليو الناس مستشارين فهاداك المجلس، ولحد الآن أنا والعديد من لمغاربة ماعارفينوش لاش لايق ومكنفرقوش بيناتهم البرلمان وصافي، و مآمنين باليقين أنه لا خير يأتي منهم، وأن البلاد ماغادا تزيد تخطوة بفضلهم، غي واحد وكيتشكى منو كولشي ويائس منو كولشي أما جو جراه كثار علما أن التاني ماعارفينو لاش صالح و آشناهي قيمتو المضافة، أيييه يمكن لبزاف ديال الناس يشرحوا ليا دور الغرفتين وبالتفصيل والسلطة التشريعية لي عندهم و أهميتهم فتحديد سياسات الدولة، ولكن ماشي هكاك كنشوفو حنا داكشي، بالنسبة ليا وولواليدة والعديد من المغاربة فراه السلطة هي القايد والوالي والعامل وداكشي ، أما المرشحين مجرد كائنات موسمية تضرك ماتفيدك، الى جات علينا حنا الدولة تزيد صلاحية القايد لتشمل تسيير الجماعات، أما الغرف ومجلس المستشارين فراه كيجينا داكشي من عيلم الغيب.
