وبزاف. وزيرة المالية حالفة ما تخدم الا مع سميج اللي كل مرة جايبة ليها فضيحة. اجتماع وزراء مالية افريقيا سالى بمقاطعة كبريات الوكالات الاخبارية

وزيرة الاقتصاد والمالية واصلاح الادارة، نادية فتاح العلوي، تالفا فالتواصل وتالفا حتى فالمارشيات ديال التواصل. ماشي تالفة ما كتخدم الا مع وحدة اللي فين ما خدمات معاها ينوضو المشاكل. البارح كان اختتام اجتماع لوزراء المالية 15 التابعة للاتحاد الأفريقي. هادا حدث مهم. شكون خدا العلاقات مع الصحافة عاود تاني؟ هاديك سناء سميج اللي كانت مع نادية فتاح باش كانت فالسياحة ومشات معاها لرواق المغرب فاكسبو دبي الدولي. نفس السيدة اللي كانت ففضيحة المؤثرين والمؤثرات عند وزارة السياحة قبل اشهر وجابو شي وحدين مدعششين.
طبعا فهاد النشاط وقعو مشاكل خايبة. التنظيم كان حالتو والعلاقة مع الصحافة كانت خايبة. حسب معطيات ل"كود" قاطعات فاليوم الاخير وكالات دولية معروفة احتجاجا على تصرفات خايبة داروها معاهم.
كيفاش هاد نادية فتاح العلوي ديما خدامة مع وحدة مع كتعرفش خدمتها. صحافيون بغاو يديرو خدمتهم تمنعو. ناض الصداع. طبعا ماشي مشكل لنشاط بحال هادا تختار هاد السيدة الصحافيين اللي يحضرو. نسدو عينينا علي هاد الشي واخا ايام المعرض كان خاص وزيرة المالية تسمع اش كيعني الحق فالمعلومة واش كيقول القانون.
التعامل باحتقار مع صحافيين وفوكالات دولية متخصصة فالمال والبيزنس ولفلوس راه شوهة. المغرب اصلا دارها باش يكتبو عليه. باش يتم تسويق هاد الشي. دابا ضربة خايبة.
وكلات نشوفو العالم يتخاطف عليهم وحنا بوجود بحال هاد المكلفة بالصحافة نجريو عليهم. هما ما باغيين يديرو والو بعشاكم. باغيين يتلاقاو مع وزراء المالية ويديرو خدمتهم. خدمة فعمقها ما يمكن تكون الا مع مصالح المغرب الاستراتيجية مع قضاياه الكبرى. لكن باش كيتجمعو شي وحدين ما عندهم علاقة الا بمصالحهم والمارشي ديالهم٬ كنوصلو لهاد النتيجة
علاش نادية فتاح ما تاخدش اطر واعرة فالمالية. اش بغات فهاد السيدة اللي فين ما حطات يديها فشي مارشي كتوقع شي تخربيقة