عصابة بالسيوفة فولاد سعيد بغاو يصفيوها لعضو فالجماعة.. و"گود" جابت آخر ما كاين فالقضية – فيديو

واحد العصابة بالسيوفة هجمات لبارح على قهوة فاولاد سعيد فإقليم سطات، لي كاينة في السطاسيون ديال تما، وجبدو السيوفة على الكليان وكانو جايين باغين يصفيوها لشي مستشار جماعي تما ولقاو غير خوه لي خوا عليهم وهرب.
تتقول مصادر خاصة ل"گود" أن هاد الفعل عندو اهداف سياسية وتصفية حسابات فهاد الاتجاه، ودارو الجوندارم انزال كبير حضرو فيه جميع المسؤولين ديال القيادة الجهوية ديال سطات وتحت إشراف القيادة العامة ديال الدرك الملكي فالرباط، وكانو الجناة ملثمين.
وعلى حسب تفاصيل "گود" فراه تعتاقل مستشار جماعي بجماعة أولاد سعيد وشي حد كيجيه على خلفية هاد الفعل الاجرامي اودبا السرية ديال سطات مزال كتحقق في الموضوع، القهوة ديال عائلة مستشار جماعي فاولاد سعيد.
هاد الشي ديال الأفلام وخص الدرك الملكي يزيد من خدمتو باش يطيح افراد العصابة لي باينة شادين فلوس باش يتعداو على الناس.
والراي العام تينتظر نتائج التحقيقات لي تشرف عليها قائد السرية ديال درك سطات ،بحيت كشفات مصادر "كود "ان كاين تدخلات امنية على قبل هاد الملف باش تفك طلاسيم هاد الجريمة لي معمر المنطقة شهدات بحال هاد النوع من الاجرام .