فضيحة كبيرة فالمغرب غادي تفرگع رمان كثير وتبين شلا خيوط بسباب أوديو التسمسير فالقضاء اللي ضرب كازا.. "لاپيجي" طيحات ريزو ديال التخلويض فهاد القطاع

هادي فضيحة كبيرة فالمغرب غادي تفرگع رمان كثير وتبين شلا خيوط بسباب أوديو التسمسير ديال القضاء اللي ضرب كازا هادي سيمانات.
في السياق ذاتو أحالت عناصر الفرقة الوطنية لشرطة القضائية طيلة يوم أمس الجمعة على أنظار الوكيل العام بمحكمة الاستئناف بكازا مجموعة من الأشخاص من ضمنهم عناصر شرطة وأعوان سلطة وسماسرية وموظفين ساميين، فيما استقبل مكتب الوكيل العام مجموعة من القضاة منهم اللي خدام فالنيابة العامة وفالقضاء الجالس فإطار الامتياز القضائي، وذلك على خلفية "الزلزال القضائي" اللي شهدته محاكم كازا.
و قالت مصادر "كَود"، أن عدد الأشخاص اللي تمت إحالتهم على مصلحة التقديم تجاوز عددهم 24 متهم، منهم من كانوا رهن تدابير الحراسة النظرية، ومنهم من كانوا في حالة سراح، بتهم كتتعلق بتكوين عصابة إجرامية، متخصصة في ارتكاب جنح وجنايات الإرشاء، التزوير في محاضر رسمية، الارتشاء والوساطة فيها لدى موظفين عموميين مقابل دفع و تلقي مبالغ مالية كبيرة، استغلال النفوذ، الخيانة الزوجية، والمشاركة والنصب.
وكتقول مصادرنا، أن الأمر مازال ملفوف بالغموض، في الوقت اللي كيقول فيه آخرون أن القضية كتتعلق بشكاية متقاض بالتلاعب في ملفه، وهو ما دفع الوكيل العام لتكليف الفرقة الوطنية بالتحقيق في الواقعة. فيما رجحت مصادر أخرى أن هاد "الزلزال" يعتبر حملة تطهير في سلك القضاء وذلك بعد انتشار تسجيلات صوتية كتضر بصورتو.