أجواء زوينة داخل الوداد قبل ماتش وجدة

أكد الدولي المغربي يحيى جبران كابيتان الوداد الرياضي أن الفرقة اللي مقبلة على مواجهة مولودية وجدة السبت الجاي فالبطولة، كتخدم وهي مرتاحة من بعدما ربحت الرجاء الرياضي فالديربي.
يحيى جبران ومن بعد عودة الوداد للتداريب حيث اللعاب استفادو من يوم راحة بعد الفوز فالديربي أكد أن الأجواء داخل الفرقة إيجابية بزاف وقال فتصريح للصفحة الرسمية ديال الحمرا: "الرباح فالديربي خلانا نتصدرو البطولة ونكملو عملنا وحنا مرتاحين، وكنشكر جميع مكونات النادي من جمهور ولعابا والسطاف كامل على المجهودات اللي كايديرو باش تبقى هاذ الفرقة ديما الفوق".
للإشارة فالوداد الرياضي غادي يسافر لمدينة وجدة باش يلعب ضد المولودية السبت الجاي فالجولة 7 من البطولة الإحترافية لكرة القدم، وهي فرصة بالنسبة للحمرا لتعزيز الصدارة وتوسيع الفارق مع المطاردين.