العبث فالسياسة.. العنصر غايبقا هو الوصي الأبدي للحركة الشعبية لي غاتولي حزب بجوج ريوس: أوزين أمين عام والعنصر رئيس وكيبقا السؤال شكون لي غايستقبلو سيدنا

الحركة الشعبية كتبقا استثناء فكولشي، مازال مبغاتش تقطع مع الزعيم الأبدي لي عمر على رأس الحزب أكثر من 35 سنة، وقررت ديرو رئيس الحزب وتعطيه الصلاحيات المتعلقة بالتحكيم في الانتخابات، أي الملف الأساسي ديال أي أمين حزب باغي يقود الحزب فالفترة ديالو.
هاد القضية تؤكد بلي الحركة الشعبية، بلاصت ماتمشي فالتطور باقا تقليدية ومبغاتش تحرر من قيود حراس المعبد. واخا دبا كاين محمد أوزين مرشح يكون أمين عام، لكن بلا صلاحيات، كولشي بيد العنصر.
خبار كتباتها "كود" لبارح الأحد حول صراعات الصلاحيات بين أوزين والعنصر، خلات الأخير يكعا ويقوليهم بلي الغدر بدا بكري وانا مبغيتش باغي نولي حتا الرئيس، طبعا حراس المعبد مخلاوهش وقالو ليه خصك تبقا رمز وحدة الحزب، لأن أوزين مكاينش عليه إجماع.
دبا المؤتمر يلا داز ونجح، كيبقا السؤال شكون غادي يستقبلو سيدنا، فحالة طلع أوزين أمين عام. واش أوزين ولا العنصر لي غادي تكون عندو الصفة الجديدة ديال رئيس الحزب؟. حزب بزوج ريوس؟ حالة ناذرة فالمشهد الحزبي المغربي. عبث حزبي وسياسي وصافي.
دبا المعارضة عندها زوج ريوس. أوزين كيعارض بشدة هاد الحكومة، واحد آخر لين ومكيبينش بلي معارض لي هو العنصر.
يشار بلي اللجنة التحضيرية للمؤتمر الوطني الرابع عشر لحزب الحركة الشعبية، أعلنت عن عقد المؤتمر يومي 25 و26 نونبر الجاري، تحت شعار "الوفاء لمغرب المؤسسات" بالمركب الرياضي الأمير مولاي عبد الله بالرباط.
فالكواليس كانت حرب بين جوج تيارات، واحد باغي يعطي جميع الصلاحيات للأمين العام المقبل لي كولشي كيروجو (محمد أوزين)، وتيار ثاني باغي يخلي اهم الصلاحيات للعنصر لي غايبقا رئيس الحزب (زعما رئيس شرفي).
أوزين باغي صلاحيات حقيقية ويقطع مع مرحلة الولاء للزعيم، باغي حزب جديد، لذلك عينو على هيئة الأمانة العامة.
اوزين واخا باغي هادشي، معندوش اغلبية مريحة، عندو معارضين بزاف، حسب مصادر "كود" اوزين فشل يحقق المراد ديالو، واللجنة التحضيرية فرضات الاجندة ديالها وغاتعطي كولشي تقريبا للعنصر.
وحسب مصدر "كود" فإن أهم الصلاحيات هي التحكيم في النزاعات، والتحكيم في التزكيات الانتخابية، هاد الصلاحيات تعطاو للعنصر، وتقريبا هي كولشي. يعني ملف الانتخابات بيد زعيم أبدي للحزب، وصعود اوزين كيبقا غير "صوري".
وثاني الخلافات داخل الحركة الشعبية، ولي ممكن يفجر المؤتمر، هي لائحة المكتب السياسي، بحيث اوزين باغي لائحة مغلقة وحيدة، وملي يجيب 51 في المائة من الأصوات يعني تفرض اللائحة ديالو وماشي التمثيل النسبي، وبالتالي التيارات الأخرى مغاديش تلقا راسها فالمكتب السياسي.
فالكواليس، المهدي عثمون، نائب رئيس مجلس المستشارين، من المعارضين ل"أوزين"، كيقوليهم بلي يلا جا شي حد يترشح ضد اوزين غادي يغلبو.