بلجيكا ربحت كندا والركراكي وولادو ما بقى عندهم علاش يدافعو الماتش الجاي

ربحت بلجيكا منتخب كندا فالماتش اللي لعبوه اليوم الأربعاء فالجولة الأولى من كأس العالم قطر 2022، فالكروب 6 وهو نفس لكروب اللي فيه المغرب.
بلجيكا الخصم المقبل ديال المغرب، قدرت تربح كندا واخا الكنديين هما اللي كانوا مزيانين فاغلب لحظات الماتش ولكن خانتهم التجربة وضيعو بزاف الكرات ومنها ضربة جزاء، مع العلم أن الحكم الزامبي سيكازوي دار جدل بسبب الأداء ديالو وعاتبوه بزاف المتابعين للماتش على شي أخطاء ما عطاهمش لكندا، أمام بلجيكا جاوها فرص قلال وقدرت ضد مجريات المباراة تماركي بيت الرباح بواسطة ميشي باتشواي فالدقيقة 44 وحافظت عليه حتى سالا الماتش.
وبهاد الرباح تصدرت بلجيكا لكروب 6 برصيد 3 النقاط وتابعها المغرب وكرواتيا اللي تعادلو اليوم زيرو لزيرو وكل واحد منهم عندو نقطة، أما كندا فهي الأخيرة فالترتيب وعندها 0 بوان، مع العلم أن المنتخب المغربي غادي يلعب ضد البلجيكيين الأحد الجاي ومن بعدها الكنديين، وخاصو يربحهم باش يتأهل.