مونديال قطر 2022.. أرقام ياسين بونو كتخلع المهاجمين ديال خصوم المنتخب

كيواصل الدولي المغربي ياسين بونو لكول ديال المنتخب الوطني المغربي التألق فسماء كأس العالم قطر 2022، من بعدما ساهم فالتأهل التاريخي للأسود لنصف نهائي كوب ديموند على حساب منتخب البرتغال فربع النهائي. وغادي يلعبو ضد فرنسا الأربعاء المقبل، فدومي فينال المونديال كأول منتخب إفريقي وعربي كيلعب هاد الدور وأول منتخب من خارج أوروبا وأمريكا الجنوبية كيوصل له من بعد إنجاز كوريا الجنوبية عام 2002.
ياسين بونو تختار للمرة الثانية على التوالي كأحسن لعاب فماتشات المغرب فكأس العالم، فمن بعدما تألق فثمن نهائي البطولة أمام إسبانيا وربح الأسود فالبيلانتيات، قدر يتألف من جديد فربع النهائي البارح ضد البرتغال ووقف سد عالي ضد الهجمات البرتغالية وتسديدات المهاجمين البرتغاليين وعطى الثقة لصحابو فليكيب ناسيونال اللي كانوا كيواجهو كريستيانو رونالدو وعارفين أن وراهم حارس كبير.
وحصل ياسين بونو، حسب إحصائيات، الاتحاد الدولي لكرة القدم الفيفا على تنقيط عالي فماتش المغرب والبرتغال، حيث فعدد 39 مرة لمس فيها لكول المغربي لكرة بالمباراة عطى 21 تمريرة ناجحة، بنسبة نجاح وصلت 70% ، وكان واعر فالثنائيات وربحهم كاملين بنسبة نجاح 100%، وتصدى 3 مرات للكرة، وحبس 3 الأهداف محققة ديال منتخب البرتغال.
للإشارة فياسين بونو قدر يحافظ على نظافة مرمى المنتخب الوطني المغربي فكأس العالم قطر 2022، خلال 3 الماتشات لعبهم وتماركا عليه هدف واحد فقط كان سجلو المدافع المغربي نايف أكرد على راسو ضد كندا، مع العلم أن بونو لعب فهاد المونديال 4 الماتشات من أصل 5 المباريات، حيث غاب ضد بلجيكا فالجولة الثانية من دور المجموعات فاخر لحظة بسبب الدوخة اللي جاتو قبل الماتش ولعب بلاصتو الكول الثاني منير المحمدي اللي حبس مزيان وقدر يعوض ياسين بونو وبالتالي المنتخب تسجل عليه هدف واحد فقط خلال 5 مباريات لعبهم إلى حدود الآن فالمونديال الشي اللي كيخليه يتوفر على أقوى دفاع.