المنتخب رجع للفيستيير متأخر فالنتيجة أمام فرنسا لأول مرة فمونديال 2022

سالا المنتخب الوطني المغربي الشوط الأول من ماتش نصف نهائي كأس العالم قطر 2022، متأخر فالنتيجة أمام المنتخب الفرنسي بطل العالم بهدف واحد لصفر.
ونجح المنتخب الفرنسي فافتتاح التسجيل فالدقيقة 5 من الشوط الأول من بعد خطأ وارتباك فصفوف الدفاع ديال المنتخب الوطني المغربي، وهو الهدف اللي ماركاو الظهير الأيسر تياكو هيرنانديز واللي كان بوحدو بدون مراقبة أمام لكول ياسين بونو وحط الكرة فالمرمى المغربية، وكان جواد ياميق قريب من تسجيل التعادل للمغرب من ضربة مقصية واعرة ولكن المرة ضربت فالبوطو، وعرفت آخر اللحظات ضغط مغربي فمحاولة لإدراك التعادل ولكن سالا الشوط الأول واحد لزيرو الفرنسيين مع العلم أن المنتخب الوطني كيخروج لاول مرة متاخر فالجولة الأولى ملي بدا كأس العالم قطر 2022.
وعرفت المبارة قبل بدايتها تغيير بتشكيلة المنتخب الوطني المغربي حيث غاب نايف أكرد عن الماتش وهو اللي كان بالتشكيلة الرسمية اللي علن عليها المدرب وليد الركراكي قبل اللقاء، ودخل بلاصتو أشرف داري ومن بعدما تسجل الهدف على المنتخب خرج غانم سايس اللي موعت ودخل بلاصتو سليم أملاح ورجع الركراكي كيلعب بالطريقة اللي تعود عليها ملي بدا كأس العالم وعزز وسط الميدان.
وغادي يكون الناخب الوطني وليد الركراكي واللعابا ديال المنتخب الوطني المغربي مطالبين بتسجيل بتعويض التأخر ديالو فالشوط الأول بهدف واحد لصفر بتسجيل هدف التعادل على الأقل الشوط الثاني باش يحافظو على حظوظهم فالمواجهة إلى آخر لحظة للتأهل الى نهائي كأس العالم أو غادي يتقصاو من نصف النهائي.