لفقيه لي كنتسناو بركتو.. أبرون رئيس بعثة المنتخب رمى التذاكر على المغاربة و ولدو حصل مخرج التيكي من مقر ليكيب ناسيونال

تصدم عدد كبير من المغاربة فظهور عضو الجامعة الملكية المغربية لكرة القدم عبد المالك أبرون رئيس بعثة المنتخب الوطني المغربي فكأس العالم قطر 2022 ، هو والولد ديالو أشرف فصورة الاحداث اللي رافقت فوضى تذاكر ماتش الترتيب للحصول على المركز الثالث فمونديال قطر 2022، وهو الماتش اللي كيواجه فيه المغرب منتخب كرواتيا اليوم السبت فتيران "خليفة الدولي".
وظهر عبد المالك أبرون ففيديو ديال موقع "شوف تيفي" وهو كيرمي تذاكر ماتش المنتخب الوطني المغربي ومنتخب كرواتيا بطريقة مهينة للجمهور المغربي، وسط فوضى كبيرة قدام فندق إقامة المنتخب الوطني المغربي فالعاصمة القطرية الدوحة وأمام عيون القطريين اللي كيتفرجو على المشجعين المغاربة وهما كيتقاتلو فحال الدجاج على التذاكر اللي رمى لهم رئيس بعثة المنتخب الوطني المغربي فمشهد كيألم أي مغربي شاهدو.
الفضيحة ديال أبرون ما غاديش توقف عند رمي التيكي للجمهور المغربي، ولكن غادي توصل حتى لولدو أشرف أبرون، وحسب فيديو اخر ديال "شوف تيفي" ولد أبرون واللي كان مسير هو باه فالمغرب التطواني، هرب بعشرات تذاكر ماتش المغرب وكرواتيا من إقامة بعثة المنتخب الوطني المغربي وهي البعثة اللي كيترأسها الاب عبد المالك أبرون، وقال الموقع المذكور أن أشرف أبرون عطى التذاكر لشي بنت ومشى معها.
ووضع الظهور ديال عبد المالك أبرون و ولدو أشرف الاثنين فموقف صعيب ومحرج بزاف، خصوصا وأنهم كانوا فمركز قرار فنادي المغرب التطواني واللي عرف أزمة خانقة من بعدما مشاو من الرئاسة ديالو، والأكثر من هذا فعبد المالك أبرون وضع فيه رئيس الجامعة الملكية المغربية لكرة القدم فوزي لقجع الثقة وامنو على المنتخب الوطني المغربي وكلفو بترأس بعثة ليكيب ناسيونال بالنيابة عليه فكأس العالم.
عبد المالك أبرون اللي كان كل مرة كيخرج عند المغاربة اللي كيجيو قدام فندق إقامة المنتخب الوطني المغربي باش يضبرو على ريوسهم بشي تذكرة فالماتشات اللي فاتو، وكيقولهم يمشيو يقلبو على التذاكر فبلاصة أخرى وأنه ما عطاش التذاكر حتى لاولادو، غادي يلقى راسو مطالب بالبحث على شي مبرر خرافي يخرج به من هاد الورطة سواء فالظهرو ديالو وهو كيرمي فالتذاكر الجمهور المغربي أو فخروج ولدو أشرف ابرون من فندق المنتخب وهو مخرج التيكي حسب ما جا الفيديوهات.