فريق فالننكليز باغي سليم أملاح واللاعب المغربي عندو فرصة يعتق راسو من ظلم البلجيكيين

دخل فريق ننكلزي على الخط باش يسني مع الدولي المغربي سليم أملاح، واللي من بعدما تألق مع المنتخب الوطني المغربي فكأس العالم قطر 2022 وحقق معه إنجاز تاريخي، رجع لفريقو ستاندار لييج البلجيكي كيواجه التهميش بشكل مقصود من إدارة النادي.
وكشفت جريدة "ديلي ميل" البريطانية، أن فريق فالننكليز حاط العين على الدولي المغربي سليم أملاح، وكيتعلق الأمر بنوتينكهام الممارس فالدوري الننكليز الممتاز.
وحسب نفس المصدر، فمدرب نوتينكهام ستيف كوبر كيطالب بلاعب وسط التيران المغربي سليم أملاح، وباغيه بالفريق وإدارة النادي الننكليزي واجدة باش تحسم الصفقة فالميركاتو الشتوية المقبل، خصوصا أن اللاعب حتى هو باغي يمشي من ستاندار لييج البلجيكي.
وكانت إدارة ستاندار لييج البلجيكي بالغت فمعاقبة سليم أملاح، حيث وقفاتو على اللعب مع الفريق الأول وهبطاتو ليسبوار بسبب عدم الرغبة ديالو فتجديد العقد مع النادي وهادشي قبل انطلاق الموسم الحالي فنوع من الضغط على اللاعب باش يجدد الكونترا، حيث كانوا عارفين أنه محتاج يلعب باش يقنع الناخب الوطني وليد الركراكي ويعيط له يشارك فكأس العالم.
أملاح كان ذكي واتصل بوليد الركراكي وشرح له الظروف الصعبة اللي كان كيمر منها والتعامل السيء لإدارة ستاندار لييج البلجيكي معه، الشي اللي جعل الناخب الوطني يتفهم الوضع ديالو وخصص له وهو وحكيم زياش اللي مكانش حتى هو كيلعب مع تشيلسي الننكليزي برنامج خاص تبعوه مع الطاقم التقني ديال ليكيب ناسيونال وكانت النتيجة التألق فكأس العالم قطر 2022، والخطوة اللي دار ستاندار لييج البلجيكي من بعد عودة سليم أملاح من كوب ديموند بأنهم زادو فتهميشهم اللاعب، كيشوفها بزاف من المتتبعين أنها انتقامي من اللاعب المغربي اللي تألق فالمونديال بالرغم من أنهم عرقلو الكاريير ديالو.