ماتش كارثي لحكيمي و PSG ضد لانس.. خسارة كبير والنجم المغربي بغا يضارب

خسر الدولي المغربي أشرف حكيمي مع باريس سان جيرمان الفرنسي أول ماتش لعبو معاه من بعدما رجع من المشاركة مع المنتخب الوطني المغربي فكأس العالم قطر 2022، وكانت المواجهة مساء أمس الأحد ضد فريق لانس كارثية لحكيمي وصحابو عن الجولة 17 من بطولة فرنسا.
وسالا الماتش بهزيمة باريس سان جيرمان بنتيجة 31، وقدر لانس يفركع مفاجأة هاد الجولة من الدوري الفرنسي، وسجل له فرانكوفسكي الهدف الأول فالدقيقة 5، وجابو باريس سان جيرمان التعادل فالدقيقة 8 بواسطة هوكو ايكيتيكي، ورجع لانس وتقدم فالمبارة عن طريق لويس اوبيندا اللي ماركا الهدف الثاني فالدقيقة 28، وأليكسيس ماوريسي بهدف ثالث فالدقيقة 48.
وشارك أشرف حكيمي كأساسي فالتشكيلة ديال باريس سان جيرمان الفرنسي فالوقت اللي كان الموهبة المغربية الصاعدة إلياس حسني احتياطي، وغاب الأرجنتيني ليونيل ميسي والبرازيلي نيمار، مع العلم أن حكيمي دخل فمناوشات مع لاعبين ديال لانس وبغى يضارب معهم حيث واحد منهم تدخل فحق صاحبو كيليان مبايي بخشونة فالدقيقة 45.
وتقلص فارق النقاط ما بين باريس سان جيرمان ولانس من بعد نتيجة هذا الماتش إلى 4 النقاط، وبقى أشرف حكيمي وصحابو متصدرين ترتيب البطولة الفرنسية برصيد 44 نقطة، ورفع لانس الرصيد ديالو إلى 40 نقطة.