برافو. الدولة غتقضي على اللي المتحايلين على القانون باش يزيد يتزوج بالثانية. وزير العدل: غتكون منصة للاذن بالزواج فيها جميع المعلومات بما فيها واش مزوج قبل واش خلص النفقة وحتى حد ما غيفلت

كشف عبد اللطيف وهبي، وزير العدل، عن خدمة معلوماتية تخص الزواج بالمغرب، بحيث أي شخص بغا يتزوج كيدخل لهاد المنصة الالكترونية لي كتكون مرتبطة بالبوابة الالكترونية للبطاقة الوطنية ديال الامن الوطني.
وقال وهبي، في جوابه على أسئلة البرلمانيين بمجلس المستشارين اليوم الثلاثاء 3 يناير 2023، بأن هاد المنصة كتعطي مودباس للراجل والمرا كيطلعو عليه غير هوما، واللي عندو الولاد كتسجل واللي مخلصش النفقة كتسجل فديك المنصة باش حتى ما يفلت.
هاد المنصة، للي كيدخلو ليها غير ثلاثة ناس، الزوج والزوجة والقاضي، هي اللي كتسمح باش تاخد الاذن بالزواج، وكولشي كيتراقب، وفق وزير العدل.
وأفاد الوزير بأن "هاد المنصة غاتقطع مع الفوضى لي كانت، وتضبط الراجل لي كيتزوج بكثر من مرا، وكيخبي على مرتو"، مضيفا :"دبا لي بغا يتزوج كولشي كيعرفو، واش مزوج ولا".
وأضاف وهبي :"اللي بغا ياخذ بالاذن بالزواج، فراه واحد لي كاين، ولي بغا يدير التعدد خصو الاذن ديال القاضي، وكاينا وثيقة أخرى كتبين فين تزوج وفين طلق وشحال ديال النفقة".