راه كاينة حياة برا فايسبوك، وكاين التشرميل والزين في تيك توك وكاين التاويل وكولشي بالقاعدة والروتينات اليومية فإنستغرام وكاين العمق والكآبة وبيلي إيليش في سناب شات

الفايسبوك وللى بحال شي بار أو قهوة ديال الشراف النهار كامل كيعاودو على الأزليات وكيهدرو فالكورة والسياسة والأفلام والموسيقى، حتى دوك لي كانو شباب فالبدايات ديال فايسبوك فالمغرب ودايرين فيها عدميين ومتمردين إما مشاو برا أو تزوجوا ودارو كريديات وهداهم الله وولاو مآمنين بالطريطات آخر الشهر، والنهار كامل وهوما يتناكرو ومبلوكيين بعضياتهم، ولي ناض من الطبلة يسمرو ليه، وفيهم السمسارة والبياعة والشراية والأساتذة والمتقاعدين والفنانة، ومرة مرة كيدخل عليهم شي واحد هاز فيديه تقيشرات وريحة وبيل سماطي ولا شارجورات بحال الى مريح فبار الريكس فقنيطرة، ومرة كيدخل شي واحد جار معاه واحد آخر مقطعاليه يد أو رجل فكروصة، أو ملوي كلو بالفاصمة ويطلب بيه، وبعد المرات كيوقع شي تسلل ديال شي آنسة كيليميني ديال لي بوب ولي بواط المحترمين تدخل تريح فداك البار ديال الشراف هنا كتوقع الثورة، وكيتجدد الشباب عند بزاف وكيبانو دوك الأزليات لي كيتعاودو ديما واش بصح وللى غير زفوط.
هادشي لي وقع ففايسبوك هاد ليوماين وحدة من إنستغرام دخلات ليه بالغلط وهو يبانليك بنادم بحال الى عمرو شاف النعمة، وحتى داك لي فايت شايفها أبان عن تعفف مبالغ فيه، نفس طريقة تعامل الشياب فشي بار ديالهم مع بنت صغيرة وزوينة وأنيقة كيولي فيهم شي صواب وإحترام فايت القياس، وطبعا غارو منها البارميطات لي ديما مرابطات تما وتاواحد عمرو عبرهم أو تعامل معاهم بديك الظرافة الزايدة والإعجاب المبالغ فيه والرطوبية السايحة، مغربية بيضة كتشطح بالتاويل على خلاف مايروج في العادة في الفايس الذي يغلب فيه الشطيح ديال العروبية والتفاخر بريحة الدوار والأصول البدوية وداكشي ديال ولاد الشعب والقبلية، عكس إنستغرام لي جاي من اللخر ولي عندو شي حاجة مصورها وحاطها بلا سرد الأزليات وباين كل واحد فيه شحال ساوي وشحال يجيب.
فايسبوك يالله فات عشرسنين في المغرب وهو يشرف واخا بدا فاللول كمساحة حرة للتعبير والتمرد وقول وتصوير مالا يقال أو يصور، ودغية تحول لشارع محمد الخامس كل واحد عندو قهوة لي كيريح فيها ديما يجمع مع عشرانو فالسياسة ولا الكورة أو أي مشترك بيناتهم، والبعض مريح فالطيراس مقابل الغادية والجايا، وكذلك عيالات الفايس، عا تا دخلات عليهم كائن غريب جاي من إنستغرام مفعم بالحياة ممسوقش للعثماني ولا بنكيران ولجنة بنموسى كاع ممديورة ليها، وهي ترون كولشي وتبين لبنادم راه كاينة حياة برا فايسبوك، وكاين التشرميل والزين في تيك توك وكاين التاويل وكولشي بالقاعيدة والروتينات اليومية فإنستغرام وكاين العمق والكآبة وبيلي إيليش في سناب شات.