وا غيثة مزور خرجي من الحكومة ايلى ما قاداش. راه اتصلت بيك على الخدمة فتلفونك كمسؤولة. اش كتخربقي وكتردي: علاش تتاصلو بي ومنين جبتو الرقم". اتي شكون كيعرفك كاع حتى وليتي فالحكومة وهاداك الرقم راه رقمك كعضوة فالحكومة وعليه اتصلت بيك

اليوم فالصباح٬ اتصلت بغيثة مزور الوزيرة المنتدبة لدى رئيس الحكومة المكلفة بالانتقال الرقمي وإصلاح الإدارة، على موضوع كيهم وزارتها ومرتابط النقاش اللي رايج هاد ليام على مباراة المحاماة. اتصلت بيها كصحافي فالبورطابل علي الرقمنة فالمباريات ديال ولوج الوظائف والمهن الحرة.
طبعا كيف كتعرفو هاد الرقمنة اللي كتشرف عليها وزارتها قادرة تقضي على تزوير عقود الازدياد وامور اخرى كثيرة.
لالاكم مزور اللي دخلات لهاد الحكومة مع ولد عمها وكلها ومع حزب= هي مع البام وهو مع الاستقلال فقطاع الصناعة والتجارة= جاوبات جواب غريب وغبي. قالت لي "منين جبتي هاد الرقم". اييه منين جبتي الرقم؟ بحال ايلى اتصلت بيها لامور اخرى. راه للخدمة. وزادت الوزيرة غير الذكية فردها "علاش اتصلتي بيا".
قلت ليها "راني صحافي. انتي وزيرة واتصلت بيك باش نسولك على موضوع كيهمك كوزيرة. كيهم قطاعك".
دابا كي دير مع هادي. كيفاش علاش اتصلتي بي" واش ما عندي ما يدار فقت الصباح٬ قلت اجي نجرب شي رقم وطحت فرقمك؟ واش عارفة راسك اشناهي خدمتك واشناهي مسؤولياتك؟ راه مشرفة علي قطاع وفهاد الاشراف كاين جانب فيه الاجابة على اسئلة الفرق البرلمانية فمجلسي النواب والمستشارين وفيه الرد على اسئلة الصحافيين والصحافيات فندوات صحافية او فحوارات مع كاع وسائل الاعلام اللي كاينة.
راه الصحافيين والصحافيات ما كيتاصلوش بيك باش يتحتو معاك ولا يقرقبو معاك الناب. واش شوية لاباس.
باش عرفات راسها كتهدرز ردات "خصك دوز على مسؤولة التواصل وتحط ليها السؤال". اه. نحطو ليها السؤال وبعد ايام يمكن ترد يمكن اللا.
دابا هادي مسؤولة هادي. شكون اللي جابها للحكومة واش تستحق هاد المنصب وحدة كترد بهاد الاجابات.
كاين نقاش كبير على عبد اللطيف وهبي وزير العدل. اه دار خطأ خايب باش قال "راه باه لاباس عليه وخلص عليه" باش يقرا ويجيب اجازة فكندا٬ باش سولوه على كيفاش نجح فمباراة المحاماة. لكن هادا جاي من السياسة. كيهدر. كيرد. البارح باش راجت خبار على استقالتو جاوب "الاخبار" باللي راه فمكتبو خدام.
هادي مزور خبز ربي فطبگو. حطوها ولبسوها لبسة وزارة كبر منها بزاف. وزيرة تالفة. وزيرة ما كتعرفش تفرق بين الشخصي والمهني.
سمعي يا لالة الوزيرة. باش يعيط عليك صحافي باش يسولك على موضوع ما تبقايش تردي "منين جبتي رقمي" راه باغي خبار ماشي شي حاجة اخرى. ايلى كان شي صحافي او صحافية تصرفو معاك تصرف غير لائق٬ من حقك تسلكي كاع المساطر اللي كيخولها ليك القانون ولكن باش يسولك صحافي علي موضوع انتي مشرفة عليه٬ خاصك تجاوبي ما تقوليش ليه "منين جبتي رقمي".
هاداك الرقم راه تعطاك كوزيرة. كمسؤولة حكومية. راه ماشي رقم شخصي. ماشي اتصال شخصي. راه اتصال مهني لصحافي مهني.