عرض جديد للمغربي عز الدين أوناحي نجم أنجي الفرنسي ونابولي الإيطالي ما مفاكش معه

قام نابولي الإيطالي بخطوة ثانية وجديدة من أجل التعاقد مع الدولي المغربي عز الدين أوناحي نجم المنتخب الوطني المغربي فكأس العالم قطر 2022، وفريق أنجي الفرنسي، من بعدم سبق له وتقدم بعرض أول القيمة ديالو 15 مليون يورو فوقت سابق.
وحسب موقع "footmercato" المتخصص فانتقالات اللاعبين، فنابولي قام بخطوة جديدة باش يحصل على خدمات عز الدين أوناحي، وتقدم بعرض ثاني من بعدما تقدم بعرض أول وسط الأسبوع، قدمت إدارة النادي الإيطالي هذه المرة وقبل ساعات فقط، عرض القيمة ديالو حوالي 19 مليون يورو لفريق أنجي مقابل التنازل عن خدمات المغربي أوناحي لاعب وسط التيران البالغ من العمر 22 عام.
نابولي باغي يضمن الحصول على توقيع عز الدين أوناحي فالميركاتو الحالي، وخدمو بزاف غياب النجم المغربي على التيرانات مؤخرا باش يرتاح من الإصابة اللي عندو، حيث الفريق الإيطالي عارف أنه فحالة ما حسمش الصفقة فالميركاتو ورجع اللاعب يلعب، فغادي تسلط عليه الأضواء كثر والمنافسين على التوقيع معه غادي يكثرو وهو الشي اللي مخلي المسؤولين ديال نابولي باغيين يستغلو الفرصة الحالية، وكيزربو باش يسنيو معه لدرجة أنهم ما عندهمش مشكل من بعدما يحسمو الصفقة يخليو اللاعب إعارة فأنجي الفرنسي حسب ما كيشترط الأخير، اللي حتى هو باغي يستغل الفرصة ويحقق أكبر ربح ممكن من الصفقة.