الاتحاد الإفريقي عين حكم فماتش الرجاء وحوريا كوناكري وعندو سوابق ضد الخضرا

عين الاتحاد الإفريقي لكرة القدم حكم ماتش الرجاء الرياضي وحوريا كوناكري الغيني فالماتش اللي غيتلعب ما بين الفريقين السبت الجاي فستاد دونور بكازا، عن الجولة 3 من ليكروب ديال عصبة أبطال إفريقيا لكرة القدم.
الكاف قرر يكلف الحكم الكيني بيتر واويرو كاماكو، باش يقود الماتش ما بين الرجاء الرياضي وفريق حوريا كوناكري الغيني، وهو الماتش اللي غيتلعب مع 8 الليل السبت الجاي فدونور.
الحكم الكيني بيتر واويرو كاماكو، عندو سوابق فليماتش ديال الرجاء الرياضي، حيث الفريق كان قدم احتجاج للكاف ضد هذا الحكم اللي قاد المباراة ما بين النسور وأورلاندو بيراتس بجنوب إفريقيا فكأس الكونفدرالية عام 2021، وكانت القرارات ديالو مجحفة وغالطة فحق الرجاء.
للإشارة فبعثة الرجاء الرياضي شدت الطريق صباح اليوم من تنزانيا إلى المغرب، من بعد ما حقق الفريق فوز مهم على سيمبا التنزاني فالجولة الثانية من ليكروب ديال العصبة ويتصدر دابا لكروب 3 برصيد 6 نقاط.