القصر الكبير يا جنان اليهودي

يا الغادي للقصر الكبير
دي معاك للحباب سلامي
قلبي دامي على لي صائر فيه
و على ولاد القصر زادت هوالي
كل نهار نسمع عليه
لي يقهر قلبي و حوالي
لي جا يأكل و ينعل فيه
كيما جنان اليهودي البالي
بعد ماكان همة و شان
قمرو نجمة فالعلالي
رجع عامر زلات
جرائم و انتحار
ناس عايشة محسوبة على الأموات
تعرف غير هاك، أرالي
الخوف معشش فالقلوب
ما بقوا عارفين القاتل من المقتول
لا العائش حزين من السالي
يا الغادي للقصر الكبير
دي معاك للحباب سوءا لي
حتى امتى تبقوا قانعين
بالصغيرة و الفتات
لي خلاولكم و خلاولي
يا المدفونين فوق التراب
الناعسين مدى الحياة
تعفنت أرواحكم
تعرات عوراتكم
راهاكا بغاوكم
را باينه بالعلالي
لا دين لا أخلاق
ديما معمرين الأسواق
تالفة حبالكم و حبالي
لي دايخ بالحشيش
و لي غلبو الزمان
و الباقي ولا بالهم بوهالي
كلشي فالمشاكل غارق
لي مزيان و لي فاسق
تالفة عليهم القبالي
و هوما خايدين
في خير القصر ناهبين
را قلبي عليكم محسر
على مالكم و مالي
يا الغادي للقصر الكبير
و صل قصراوة سلامي
و إذا سولوك شكون بعثنا السلام قولهم:
أنا لي مشهدة و موحدة
و لي قاري تاريخ القصر كيعرف
شعلة حب الوطن فالعروق موقدالي
بنت المرس و درب سيدي سليمان،
المرينة و رياضات زمان
و شهادة الميلاد فالقصر ما تالفالي
أنا لي خليت الحباب و عروقي ساكنة فيه
جدود جدودي مدفونين فيه
و إذا كتاب نرجع نتدفن فحضنه
من غير أرضه ، قبر ما يحلالي
يا الغادي القصر الكبير
وصل لقصاروة السلام
و باش منطولشي الكلام
الله يلطف بيه و بينا
هو العالم و العالي