الغابة

السبوعا فلغابة شبعانين...
والذياب حقوقهم مهدورة
الشي اللي بغاوه يحضر فلحين...
وياويح اللي رد الهضرة
هديرهم مسموع وخا بعيدين...
و الذيب بخوفهم عايش فقهرة
ماقاد على خصامهم مسكين...
أو كل نهار يوجد ليهم بقرة
يفرسوها بنيابهم الطويلين...
و يآمروه يزيدهم وحدا اخرى
عمرهم ما شبعوا ديما جايعين...
و هو فوسطهم عايش فحيرة
الذيب وضعاف لوحوش تجمعوا كاملين...
وفمجمعهم قروا الثورة
بلسان واحد نطقوا داويين...
خلاص ملينا من هاذ الحقرة
ياك الغابة ديال رب العالمين ...
وعلاش السبوعة فيها مسيطرة
حتى حنا بغينا فيها نكونو عايشين...
مانحسو لابتهميش لابقهرة
لخير كثير، لينا ولوحوش اجمعين...
او مالنا على هاذ العيشة المرة
وصل لخبار لسبوعا في الحين...
خافوا ووجوهم ولات صفرة
حيت حسو بلي هوما الضالمين...
او قالو مع الذيب ما بقات هضرة
وخا حنا وحوش لغابة الضاريين...
قادر بإيمانو يهزمنا غير بنضرة
الا شكا بنا لله والي معاه كاملين
ديالتنا ماتعاود وتعود علينا بلحصرة
اجي ننساوا بلي كنا عليهم مهيمنين
ونتعاونوا جميع ونرضوا الغابة خضرة
سبحانك يا رب العالمين
يا لي ما خفاتك خافية ولا منعتك قدرة