ثاني اسوء مهنة فالعالم بعد مدرب ديال الوداد البيضاوي

هي ملك ديال المغرب .. كيموت ليك الواليد كيخليك باقي صغير يلاه تعلمتي كتكمي مارلبورو كتشد الحكم كتلقا الساحة السياسية فيها حميد شباط وادريس لشكر وصلاح الديك مزوار وفاطمة اوشاي وعثمان مولين لي كيشبه لسناء بنت خالتي … وانت معندكش خبرة فالشأن العام لأن الواليد ديال منين كان بالروح كيدير السياسة انت اهم حاجة كان مسموحلك ديرها كأمير هي تصنت للشاب حسني …المهم كدور تشوف الشعب كتلقاه ملاهي غير مع التعبئة ديال التيصالات والسؤال الجوهري لي مطروح عند المواتن هو عشرين درهم ديال التعبية واش فيها الساعة ؟؟ وانت خصك تشكل الحكومة ودشن البزابز وتفرق الحريرة على الجمهور ديال اولمبيك خريبكة وتفتتح مراكز رعاية الأمهات في وضعية تشتت وتعين السوفراء وتقابل السلك الديبلوفاسي وتحضي الصحفيين شنو كيشربو فالسيغافريظو وتخلص القوات المساعدة وتعطي الرعاية السامية لمهرجان الدقة المراكشية وتصلي الجمعة كل مرة فشي جامع مبغاشي يطيح من عهد الادارسة وتفاوض على الوضع المتقدم فالاتحاد الزموري للخميسات .. وتخلص الدولة العميقة والمعارضة والاغلبية باش يفيقو فالصباح ويجيو ينعسو فالبرلمان … وتشري المطريال والحوايج لجوق الخمسة والخمسين نهار العيد وسير وسير وسير وفاللخر منين تجي تنعس وتبغي تفتح شي موسقي مغربية فالتلفون يخرجليك عاظل الميلودي مخرج ديسكو على الماتش ديال بدر هاري وكيقولك فخاطر جاااا لاللة المااااليك … كتشوف فيه مزيان تا كتعيا وكتقول ياربي كون كونت مدرب ديال الوداد البيضاوي ومنخدمش هاد الخدمة … المهم كولشي ديال الله وصافي …